മഞ്ജു വാര്യരുടെ ഇൻഡോ- അറബിക് ചിത്രം ആരംഭിച്ചു; കൂടുതൽ വിവരങ്ങളിതാ..!

മലയാളത്തിന്റെ ലേഡി സൂപ്പർ സ്റ്റാർ എന്നറിയപ്പെടുന്ന മഞ്ജു വാര്യർ ഇപ്പോൾ ഒട്ടേറെ ചിത്രങ്ങളുമായി തിരക്കിലാണ്. അതിനിടയിൽ മഞ്ജു നായികാ വേഷം ചെയ്യുന്ന പുതിയ ചിത്രത്തിന്റെ ഷൂട്ടിംഗ് കൂടി ആരംഭിച്ചിരിക്കുകയാണ്. ഇന്തോ-അറബിക് ചിത്രമായി ഒരുക്കുന്ന ഈ ചിത്രത്തിന്റെ പേര് ആയിഷ എന്നാണ്. റാസൽ ഖൈമയിൽ ചിത്രീകരണം ആരംഭിച്ച ഈ ചിത്രം സംവിധാനം ചെയ്യുന്നത് നവാഗതനായ ആമിർ പള്ളിക്കാൽ ആണ്. ആഷിഫ് കക്കോടി രചിച്ച ഈ ചിത്രം മലയാളത്തിന് പുറമെ ഇഗ്ലീഷിലും അറബിയിലും എത്തും. ഇതിനു പുറമെ തമിഴ്, തെലുങ്ക്, ഹിന്ദി, കന്നഡ, തുടങ്ങിയ ഇന്ത്യൻ ഭാഷാ പതിപ്പുകളിലും ഈ സിനിമ റിലീസ് ചെയ്യുമെന്നാണ് അണിയറ പ്രവർത്തകർ അറിയിച്ചിട്ടുള്ളത്. മജ്ഞു വാര്യർക്കു പുറമെ രാധിക, സജ്ന, പൂർണിമ, ലത്തീഫ( ടുണീഷ്യ), സലാമ(യു.എ.ഇ.), ജെന്നിഫർ (ഫിലിപ്പൈൻസ് ), സറഫീന (നൈജീരിയ) സുമയ്യ (യമൻ), ഇസ്ലാം (സിറിയ) തുടങ്ങിയ വിദേശ താരങ്ങളും അഭിനയിക്കുന്ന ഈ സിനിമ, ക്രോസ് ബോർഡർ ക്യാമറയുടെ ബാനറിൽ സക്കറിയ ആണ് നിർമ്മിക്കുന്നത്.

ഫെദർ ടച്ച് മൂവി ബോക്സ്, ഇമാജിൻ സിനിമാസ്, ലാസ്റ്റ് എക്സിറ്റ് സിനിമാസ് എന്നീ ബാനറുകളിൽ ശംസുദ്ധീൻ, സക്കറിയ വാവാട്, ഹാരിസ് ദേശം, അനീഷ് പി.ബി എന്നിവരാണ് ഈ ചിത്രത്തിന്റെ സഹനിർമ്മാതാക്കൾ ആയി എത്തുന്നത്. എം ജയചന്ദ്രൻ സംഗീത സംവിധാനം നിർവഹിക്കുന്ന ഈ ചിത്രത്തിൽ പ്രശസ്ത ഇന്ത്യൻ ഗായകർക്കൊപ്പം അറബി സംഗീതജ്ഞരും ഗാനം ആലപിക്കുന്നുണ്ട്. വിഷ്ണു ശർമ ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് അപ്പു എൻ ഭട്ടതിരി ആണ്. ഡൽഹി, ബോംബെ എന്നിവിടങ്ങളിലായ് ഫെബ്രുവരി അവസാനത്തോടെ ആണ് ഈ ചിത്രത്തിന്റെ ഇന്ത്യയിലെ ചിത്രീകരണം നടക്കുക. ജാക്ക് ആൻഡ് ജിൽ, ലളിതം സുന്ദരം, മേരി ആവാസ് സുനോ, പടവെട്ട്‌, കയറ്റം, വെള്ളരിക്കാപ്പട്ടണം, അമരിക്കി പണ്ഡിറ്റ്, 9 എം എം, കാപ്പ, എന്നിവയാണ് മഞ്ജു വാര്യരുടേതായി ഇനി വരാനുള്ള മറ്റു ചിത്രങ്ങൾ.