നായിക മാത്രമല്ല ഗായികയും; അജിത്തിന്റെ തുനിവിൽ പുതിയ റോളുമായി മഞ്ജു വാര്യർ

തല അജിത്തിനെ നായകനാക്കി എച്ച് വിനോദ് ഒരുക്കുന്ന പുതിയ ചിത്രമാണ് തുനിവ്. ഒരു ഹെയ്‌സ്റ്റ് ത്രില്ലറായി ഒരുക്കുന്ന ഈ ചിത്രം അടുത്ത വർഷം ജനുവരിയിൽ പൊങ്കൽ റിലീസായി ആണ് പ്രേക്ഷകരുടെ മുന്നിലെത്തുക. മലയാളത്തിന്റെ ലേഡി സൂപ്പർ സ്റ്റാർ മഞ്ജു വാര്യരാണ് ഈ ചിത്രത്തിലെ നായികാ വേഷം ചെയ്യുന്നത്. വെട്രിമാരൻ- ധനുഷ് ടീമിന്റെ അസുരൻ ചെയ്തതിനു ശേഷം മഞ്ജു വാര്യർ തമിഴിൽ നായികാ വേഷം ചെയ്യുന്ന ചിത്രമാണ് തുനിവ്. ഇപ്പോഴിതാ ഈ ചിത്രത്തിൽ ഒരു ഗാനവും ആലപിച്ചിരിക്കുകയാണ് മലയാളത്തിന്റെ ഈ ലേഡി സൂപ്പർസ്റ്റാർ. താൻ ഈ ചിത്രത്തിന് വേണ്ടി പിന്നണി പാടുന്ന വിവരം മഞ്ജു വാര്യർ തന്നെയാണ് കഴിഞ്ഞ ദിവസം സോഷ്യൽ മീഡിയയിൽ പങ്ക് വെച്ചത്. മഞ്ജു വാര്യർ ആദ്യമായി ആലപിക്കുന്ന തമിഴ് ​ഗാനം കൂടിയായിരിക്കും ഇത്. സൂപ്പർ ഹിറ്റ് സംഗീത സംവിധായകൻ ജിബ്രാൻ ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിക്കുന്നത്.

അജിത്തും എച്ച് വിനോദും ബിഗ് ബഡ്ജറ്റ് ചിത്രമായ വലിമൈക്ക് ശേഷം ഒന്നിക്കുന്ന ചിത്രമാണ് തുനിവ്. സംവിധായകൻ തന്നെ രചനയും നിർവഹിച്ച ഈ ചിത്രത്തിന്റെ നിർമ്മാണം നിർവഹിക്കുന്നത് ബോണി കപൂറാണ്. അദ്ദേഹം തന്നെയാണ് അജിത്- വിനോദ് കൂട്ടുകെട്ടിലെ മുൻ ചിത്രങ്ങളായ നേർക്കൊണ്ട പാർവൈ, വലിമൈ എന്നിവ നിർമ്മിച്ചതും. നീരവ് ഷാ ക്യാമറ ചലിപ്പിച്ച തുനിവ് എഡിറ്റ് ചെയ്യുന്നത് വിജയ് വേലുകുട്ടിയാണ്. ഈ ചിത്രത്തിലെ അജിത്തിന്റെ ലുക്ക് സോഷ്യൽ മീഡിയയിൽ വൈറലായി മാറിയിരുന്നു. വീര, സമുദ്രക്കനി, ജോണ്‍ കൊക്കെൻ, തെലുങ്ക് നടൻ അജയ് തുടങ്ങിയവരും തുനിവിൽ അഭിനയിക്കുന്നുണ്ട്.