മഞ്ജു വാര്യർ പിന്മാറി; ജോഷി ചിത്രത്തിൽ ജോജുവിന്റെ നായികയായി നൈല ഉഷ..!

മാസ്റ്റർ ഡയറക്ടർ ജോഷി ഒരു ഇടവേളയ്ക്കു ശേഷം സംവിധാനം ചെയ്യാൻ പോകുന്ന പുതിയ ചിത്രമാണ് പൊറിഞ്ചു മറിയം ജോസ്. പ്രശസ്ത നടൻ ജോജു ജോർജ് നായകനായി എത്തുന്ന ഈ ചിത്രത്തിൽ നൈല ഉഷ ആയിരിക്കും നായികാ വേഷത്തിൽ എത്തുക എന്നാണ് പുതിയ റിപ്പോർട്ടുകൾ പറയുന്നത്. നേരത്തെ പ്രശസ്ത നടി മഞ്ജു വാര്യരെ ആയിരുന്നു ഇതിൽ നായികയായി തീരുമാനിച്ചത്. എന്നാൽ മോഹൻലാൽ ചിത്രമായ മരക്കാർ, ധനുഷ്- വെട്രിമാരൻ ചിത്രമായ അസുരൻ എന്നിവയുടെ തിരക്കിൽപെട്ട മഞ്ജു ഇതിൽ നിന്ന് പിന്മാറിയിരുന്നു. അതിനു ശേഷം മമത മോഹൻദാസിനെയും ഈ ചിത്രത്തിലെ നായികാ വേഷത്തിലേക്ക് പരിഗണിച്ചു. എന്നാൽ ഇപ്പോൾ  ആ അവസരം വന്നു ചേർന്നിരിക്കുന്നത് നൈലയുടെ കയ്യിൽ ആണ്. 

ഡേവിഡ് കാച്ചപ്പിള്ളി പ്രൊഡക്ഷൻസ് അവതരിപ്പിക്കുന്ന ഈ ചിത്രം ഒരു ഫാമിലി ത്രില്ലെർ ആയാണ് ഒരുക്കുന്നത്. കീർത്തന മൂവീസിന്റെ ബാനറിൽ റെജി മോൻ നിർമ്മിക്കുന്ന ഈ ചിത്രം തൃശൂരിന്റെ ക്രൈസ്തവ പശ്ചാത്തലത്തിൽ ആണ് കഥ പറയുന്നത്. ചെമ്പൻ വിനോദ്, ഇന്നസെന്റ് എന്നിവരും നിർണ്ണായക വേഷങ്ങൾ ചെയ്യുന്ന ഈ ചിത്രം രചിക്കുന്നത് അഭിലാഷ് എൻ ചന്ദ്രൻ ആണ്. ജേക്സ് ബിജോയ് സംഗീതം ഒരുക്കുന്ന ഈ ചിത്രത്തിന് വേണ്ടി ദൃശ്യങ്ങൾ നൽകുന്നത് അജയ് ഡേവിഡ് കാച്ചപ്പിള്ളിയും ഈ ചിത്രം എഡിറ്റ് ചെയ്യുന്നത് ശ്യാം ശശിധരനും ആണ്. ഫെബ്രുവരി പതിനൊന്നിന് ആണ് ഈ ചിത്രത്തിന്റെ ഷൂട്ടിംഗ് ആരംഭിക്കുക. സൂപ്പർ ഹിറ്റായ എം പദ്മകുമാർ ചിത്രം ജോസഫിന് ശേഷം ജോജു നായകനായി എത്തുന്ന ചിത്രമാണ് ഇത്. നാളെ റിലീസ് ആവുന്ന ലോനപ്പന്റെ മാമോദീസ എന്ന ജയറാം ചിത്രത്തിലും ജോജു മികച്ച ഒരു വേഷം ചെയ്യുന്നുണ്ട്.