ആരാധകർ ആവേശത്തോടെ കാത്തിരിക്കുന്ന മോഹൻലാൽ – പ്രിഥ്വിരാജ് ചിത്രം ലൂസിഫറിൽ മഞ്ജു വാര്യർ നായിക ?

പ്രഖ്യാപനം വന്ന നാൾ മുതൽ ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ലൂസിഫർ. മലയാളത്തിൽ വളരെയധികം ആരാധകരുള്ള രണ്ട് സൂപ്പർതാരങ്ങൾ ഒന്നിക്കുന്ന ചിത്രത്തിൽ മോഹൻലാൽ നായകനായി എത്തുമ്പോൾ മലയാളികളുടെ പ്രിയതാരം പൃഥ്വിരാജ് ചിത്രത്തിലൂടെ സംവിധായക വേഷം ആദ്യമായി അണിയുന്നു. 25 കോടിയോളം മുടക്കി വമ്പൻ ബജറ്റിലൊരുങ്ങുന്ന ചിത്രം നിർമ്മിക്കുന്നത് ആശിർവാദ് സിനിമാസിനു വേണ്ടി ആന്റണി പെരുമ്പാവൂരാണ്. മുരളി ഗോപിയാണ് ചിത്രത്തിന് രചന നിർവ്വഹിക്കുന്നത്. ചിത്രം താൻ രചിക്കുന്ന ആദ്യത്തെ മാസ് എന്റർടെയ്നർ ആയിരിക്കുമെന്ന് തിരകഥാകൃത്ത് മുരളി ഗോപി മുൻപ് വെളിപ്പെടുത്തിയിരുന്നു. ചിത്രത്തിന്റെ അവസാനഘട്ട ചർച്ചകളുടെ ദൃശ്യങ്ങൾ മോഹൻലാൽ തന്നെയാണ് ഫേസ്ബുക്കിലൂടെ പുറത്തുവിട്ടത്. ചിത്രത്തിൻറെ ഷൂട്ടിംഗ് ജൂലൈയിൽ തുടങ്ങാനിരിക്കുകയാണ് ചിത്രത്തിലെ നായികയുടെ വിവരം പുറത്തുവരുന്നത്.

മലയാളികളുടെ പ്രിയ നായിക മഞ്ജുവാര്യർ ചിത്രത്തിലൂടെ മോഹൻലാലിന്റെ നായികയായി എത്തുമെന്നാണ് പുറത്തുവരുന്ന വാർത്തകൾ. എങ്കിലും വാർത്ത ഇതുവരെയും ഔദ്യോഗികമായി അണിയറപ്രവർത്തകർ പുറത്തുവിട്ടിട്ടില്ല. വിവാഹ ശേഷം ഇടവേളയെടുത്ത മഞ്ജു വാര്യർ പിന്നീട് വലിയ തിരിച്ചുവരവ് നടത്തിയത് ഹൗ ഓൾഡ് ആർ യു എന്ന റോഷൻ ആൻഡ്രൂസ് ചിത്രത്തിലൂടെയായിരുന്നു. രണ്ടാം വരവിൽ സത്യൻ അന്തിക്കാട് ചിത്രമായ എന്നും എപ്പോഴും, ബി. ഉണ്ണികൃഷ്ണൻ ചിത്രമായ വില്ലൻ എന്നിവയിൽ മഞ്ജു വാര്യർ മോഹൻലാലിന്റെ നായിക കഥാപാത്രത്തെ അവതരിപ്പിച്ചിട്ടുണ്ട്. കഴിഞ്ഞവാരം ഷൂട്ടിംഗ് പൂർത്തിയാക്കിയ മോഹൻലാൽ ബിഗ്ബജറ്റ് ചിത്രം. ഒടിയനിലയാണ് ഇരുവരും അവസാനമായി ഒന്നിച്ചത്. ചിത്രം ഷൂട്ടിംഗ് പൂർത്തിയാക്കി റിലീസിന് ഒരുങ്ങവെയാണ് പുതിയ വാർത്ത എത്തുന്നത്.