യു.എ.ഇയിൽ റോഡ് അടച്ച് ലേഡി സൂപ്പർ സ്റ്റാറിന്റെ ആയിഷ; പാൻ ഇന്ത്യൻ താരമാവാൻ മഞ്ജു വാര്യർ..!

മലയാളത്തിന്റെ ലേഡി സൂപ്പർ സ്റ്റാർ മഞ്ജു വാര്യർ നായികാ വേഷം ചെയ്യുന്ന ഏറ്റവും പുതിയ ചിത്രമാണ് ആയിഷ. ഈ ചിത്രത്തെ കുറിച്ച് ഒട്ടേറെ കഥകളാണ് ദിവസവും സോഷ്യൽ മീഡിയയിൽ പരക്കുന്നത്. റാസൽ ഖമൈയിലെ അൽ ഖസ് അൽ ഗാമിദ് എന്ന കൊട്ടാര സമാനമായ വീട്ടിൽ ഇതിന്റെ ചിത്രീകരണം ആരംഭിച്ചതു മുതൽ അത്തരം കഥകൾ വരാൻ തുടങ്ങി. ആദ്യത്തെ മലയാള- അറബിക് ചിത്രം എന്നത് മാത്രമല്ല ആയിഷയുടെ പ്രത്യേകത, ഇംഗ്ളീഷ് ഉൾപ്പെടെ ഏഴു ഭാഷകളിൽ ആണ് ഈ ചിത്രം എത്തുന്നത്. അതുകൊണ്ട് തന്നെ മലയാളത്തിന്റെ ലേഡി സൂപ്പർ സ്റ്റാർ പാൻ ഇന്ത്യൻ താരമായി മാറാൻ പോവുകയാണ് ഈ ചിത്രത്തിലൂടെ എന്ന് പറയാൻ സാധിക്കും. ഈ ചിത്രത്തിന്റെ നൃത്ത സംവിധാനം നിർവഹിക്കുന്നത് പ്രഭുദേവയാണ് എന്നതും വലിയ വാർത്തയാണ്. ഒരു സ്ത്രീ കേന്ദ്രീകൃത സിനിമയിൽ ഏറ്റവും മുതൽ മുടക്കുള്ള മലയാള ചിത്രമായിരിക്കും ആയിഷ എന്നതാണ് സത്യം.

യു.എ.ഇ യിൽ പ്രധാന റോഡ് അടച്ച്, ഈ ചിത്രത്തിന്റെ ചിത്രീകരണം നടത്തുന്നതിന്റെ വീഡിയോ കഴിഞ്ഞ ദിവസം പുറത്തു വന്നിരുന്നു. അത്ര വലിയ രീതിയിലാണ് ഈ ചിത്രം ഒരുങ്ങുന്നത്. മഞ്ജു വാര്യരുടെ അഭിനയജീവിതത്തിലെ ഏറ്റവും മികച്ച കഥാപാത്രമായാണ് ആയിഷ ഒരുങ്ങുന്നത് എന്നും അണിയറ പ്രവർത്തകർ സൂചിപ്പിക്കുന്നു. പ്രശസ്ത മലയാള നടി രാധികയും ഈ ചിത്രത്തിൽ സുപ്രധാന വേഷം അവതരിപ്പിക്കുന്നു. ഇവരെ കൂടാതെ സജ്ന, പൂർണിമ, ലത്തീഫ (ടുണീഷ്യ), സലാമ (യു.എ.ഇ.), ജെന്നിഫർ (ഫിലിപ്പൈൻസ്), സറഫീന (നൈജീരിയ), സുമയ്യ (യമൻ), ഇസ്ലാം (സിറിയ) തുടങ്ങിയ വിദേശ താരങ്ങളും ഇതിൽ അണിനിരക്കുന്നുണ്ട്. നവാഗതനായ ആമിർ പള്ളിക്കൽ സംവിധാനം ചെയ്യുന്ന ഈ ചിത്രം ഡൽഹിയിലും മുംബൈയിലും ഷൂട്ട് ചെയ്യും. ബിഗ് ബഡ്ജറ്റ് തെലുങ്കു – ഹിന്ദി ചിത്രമായി ലിഗറിനുശേഷം വിഷ്ണുശർമ്മ ഛായാഗ്രഹണം നിർവഹിക്കുന്ന മലയാള ചിത്രം കൂടിയാണ് ആയിഷ എന്നതും എടുത്തു പറയേണ്ട കാര്യമാണ്. ആഷിഫ് കക്കോടി രചന നിർവഹിക്കുന്ന ആയിഷ ക്രോസ് ബോർഡർ സിനിമയുടെ ബാനറിൽ സംവിധായകൻ സഖറിയയാണ് നിർമ്മിക്കുന്നത്.

ഫോട്ടോ കടപ്പാട്: Alex J Pulickal