ഈ സിനിമ ഇറങ്ങുന്ന ദിവസമായിരിക്കണം ഓണവും വിഷുവും ബക്രീദും എല്ലാം; മാമാങ്കത്തെ കുറിച്ച് മമ്മൂട്ടി..!

രണ്ടു ദിവസം മുൻപാണ് മെഗാ സ്റ്റാർ മമ്മൂട്ടി തന്റെ അറുപത്തിയെട്ടാം ജന്മദിനം ആഘോഷിച്ചത്. അദ്ദേഹത്തിന്റെ ജന്മദിന ആഘോഷത്തിന്റെ ഭാഗമായി അദ്ദേഹത്തിന്റെ കരിയറിലെ ഏറ്റവും വലിയ ചിത്രമായ മാമാങ്കത്തിന്റെ മേക്കിങ് വീഡിയോ ഒരു ചടങ്ങു നടത്തി പുറത്തു വിട്ടിരുന്നു. ആ ചടങ്ങിൽ വെച്ച് മമ്മൂട്ടി പറഞ്ഞ വാക്കുകൾ ആണ് ഇപ്പോൾ വൈറൽ ആവുന്നത്. സാധാരണ സിനിമകൾ റിലീസ് ചെയ്യുന്നത് ഓണവും വിഷുവും ഈദും പോലുള്ള സീസണുകളിൽ ആണെന്നും, എന്നാൽ മാമാങ്കം റിലീസ് ചെയ്യുന്ന ദിവസം ആയിരിക്കണം പ്രേക്ഷകർ ഓണവും വിഷുവും ബക്രീദും എല്ലാം ആഘോഷിക്കേണ്ടത് എന്ന് പറയുന്നു മമ്മൂട്ടി. അത്ര ആഘോഷമായി ഈ ചിത്രത്തെ ഏവരും ഏറ്റെടുക്കണം എന്നാണ് അദ്ദേഹം തന്റെ വാക്കിലൂടെ അർത്ഥമാക്കിയത്. ഈ സിനിമയ്ക്കു പിന്നിൽ പ്രവർത്തിച്ചവരുടെ പരിശ്രമം അത്ര വലുതാണ് എന്നും അതുകൊണ്ടു തന്നെ പ്രേക്ഷകർക്ക് ആഘോഷമാക്കാവുന്ന എല്ലാം ഈ ചിത്രത്തിൽ ഉണ്ടെന്നും അദ്ദേഹം കൂട്ടിച്ചേർത്തു.

ഈ ബിഗ് ബജറ്റ് ചിത്രം ഈ വർഷം ഒക്ടോബറിൽ റിലീസിന് എത്തും എന്നാണ് ഇതുവരെയുള്ള റിപ്പോർട്ടുകൾ പറയുന്നത്. പ്രശസ്ത സംവിധായകൻ ആയ എം പദ്മകുമാർ ആണ് മാമാങ്കം സംവിധാനം ചെയ്തിരിക്കുന്നത്. കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി നിർമ്മിച്ച ഈ ചിത്രത്തിൽ മമ്മൂട്ടിക്കൊപ്പം ഉണ്ണി മുകുന്ദൻ, അനു സിതാര, സുദേവ് നായർ തുടങ്ങിയവരും ബോളിവുഡ് നടി പ്രാചി ടെഹ്‌ലനും പ്രധാന വേഷങ്ങൾ ചെയ്യുന്നു. ശാം കൗശൽ, ത്യാഗരാജൻ മാസ്റ്റർ എന്നിവർ ഒരുക്കിയ വമ്പൻ ആക്ഷൻ രംഗങ്ങൾ ഈ ചിത്രത്തിന്റെ ഹൈലൈറ്റ് ആണെന്ന് റിപ്പോർട്ടുകൾ സൂചിപ്പിക്കുന്നു. ഇപ്പോൾ പോസ്റ്റ്-പ്രൊഡക്ഷൻ സ്റ്റേജിൽ ഉള്ള ചിത്രത്തിന്റെ ടീസർ, ട്രൈലെർ എന്നിവ അധികം വൈകാതെ പുറത്തു വിടും എന്നാണ് പ്രതീക്ഷ.