പട്ടാള യൂണിഫോമിൽ ആയുധമേന്തി മെഗാ സ്റ്റാർ; ‘ഏജന്റ്’ വമ്പൻ പ്രതീക്ഷയോടെ ആരാധകർ

മലയാളത്തിന്റെ മെഗാ സ്റ്റാർ മമ്മൂട്ടി അഭിനയിച്ച ഏറ്റവും പുതിയ തെലുങ്ക് ചിത്രമാണ് ഏജന്റ്. തെലുങ്ക് യുവ താരം അഖിൽ അക്കിനേനി നായകനായി എത്തുന്ന ഈ ചിത്രത്തിൽ ഒരു മിലിറ്ററി ഓഫീസർ ആയാണ് മമ്മൂട്ടി വേഷമിട്ടിരിക്കുന്നത്. ഈ ചിത്രത്തിന്റെ ആദ്യ ടീസർ നാളെ റിലീസ് ചെയ്യാൻ പോവുകയാണ്. അതിനു മുന്നോടിയായി അവർ റിലീസ് ചെയ്ത, അഖിൽ അക്കിനേനിയുടെ പോസ്റ്റർ വലിയ ഹിറ്റായി മാറിയിരുന്നു. ഇപ്പോഴിതാ ഈ ചിത്രത്തിലെ മമ്മൂട്ടിയുടെ പുത്തൻ പോസ്റ്ററാണ് സോഷ്യൽ മീഡിയയുടെ ശ്രദ്ധ നേടുന്നത്. പട്ടാള യൂണിഫോമിൽ ആയുധമേന്തി നിൽക്കുന്ന മമ്മൂട്ടി കഥാപാത്രത്തിന്റെ മാസ്സ് പോസ്റ്റർ ആണ് ഇപ്പോൾ പുറത്തു വിട്ടിരിക്കുന്നത്. പാൻ ഇന്ത്യൻ റിലീസായി എത്തുന്ന ഏജന്റ് സംവിധാനം ചെയ്തിരിക്കുന്നത് സൂപ്പർ ഹിറ്റ് തെലുങ്കു സംവിധായകനായ സുരേന്ദർ റെഡിയാണ്. ഹിപ്ഹോപ്പ് തമിഴയാണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത്.

ഹോളിവുഡ് ത്രില്ലർ ബോൺ സീരിസിൽ നിന്നും പ്രചോദനമുൾക്കൊണ്ട് ഒരുക്കിയ ചിത്രമാണ് ഏജന്റ് എന്നാണ് ലഭിക്കുന്ന റിപ്പോർട്ടുകൾ പറയുന്നത്. ആക്ഷന്‍ രംഗങ്ങള്‍ക്ക് ഏറെ പ്രാധാന്യമുള്ള ഈ ചിത്രത്തിന് വേണ്ടി വമ്പൻ മേക്കോവറാണ് അഖിൽ അക്കിനേനി നടത്തിയത്. രാകുൽ ഹെരിയൻ ക്യാമറ ചലിപ്പിച്ച ഈ ചിത്രം ഹൈദരാബാദ്, ഡൽഹി, ഹംഗറി എന്നിവിടങ്ങളിലൊക്കെ ഷൂട്ട് ചെയ്തിട്ടുണ്ട്. എകെ എന്റർടൈൻമെന്റ്‌സിന്റെയും സുരേന്ദർ 2 സിനിമയുടെയും ബാനറിൽ രാമബ്രഹ്മം സുങ്കരയാണ് ഈ ചിത്രം നിർമ്മിച്ചിരിക്കുന്നത്. വക്കന്തം വംശി രചിച്ച ഈ ചിത്രത്തിൽ നവാഗതയായ സാക്ഷി വൈദ്യ നായികാ വേഷം ചെയ്യുന്നു. ദേശീയ അവാർഡ് ജേതാവായ നവീൻ നൂലിയാണ് ഈ ചിത്രം എഡിറ്റ് ചെയ്യുന്നത്.