ഗോവയിലും കയ്യടി നേടി മമ്മൂട്ടി; അന്താരാഷ്ട്ര ചലച്ചിത്രോത്സവത്തിലും തിളങ്ങി കാതൽ

മെഗാസ്റ്റാർ മമ്മൂട്ടി നായകനായ കാതൽ എന്ന ചിത്രം കഴിഞ്ഞ ദിവസമാണ് ആഗോള റിലീസായി പ്രേക്ഷകരുടെ മുന്നിലെത്തിയത്. ആദ്യ ഷോ മുതൽ പ്രേക്ഷകരും നിരൂപകരും പ്രശംസകൾ കൊണ്ട് മൂടിയ ഈ ചിത്രം പ്രമേയത്തിന്റെ ശ്കതി കൊണ്ടും അഭിനേതാക്കളുടെ പ്രകടന മികവ് കൊണ്ടും വലിയ കയ്യടിയാണ് നേടുന്നത്. ഇപ്പോഴിതാ, കേരളത്തിൽ മാത്രമല്ല, ഗോവയിലും ഈ ചിത്രത്തിന് വലിയ അഭിനന്ദനമാണ് ലഭിക്കുന്നതെന്ന വാർത്തകളാണ് വരുന്നത്. ഇപ്പോള്‍ നടക്കുന്ന ഗോവ ചലച്ചിത്രോത്സവത്തിലും കാതലിന്‍റെ പ്രദര്‍ശനം ഇന്നലെയാണ് നടന്നത്. ഇന്ത്യന്‍ പനോരമയില്‍ ഇടംപിടിച്ചിരിക്കുന്ന ഈ ചിത്രത്തിന്റെ പ്രദർശനം അവിടെ നടന്നപ്പോൾ, അവിടെ നിന്നും വലിയ പ്രേക്ഷക പ്രതികരണമാണ് കാതലിന് ലഭിച്ചിരിക്കുന്നത്. മമ്മൂട്ടിക്കൊപ്പം ഈ ചിത്രത്തിൽ പ്രധാന വേഷങ്ങൾ ചെയ്ത മുത്തുമണി, ചിന്നു ചാന്ദിനി, സുധി കോഴിക്കോട് എന്നിവർ ഇതിന്റെ ഗോവയിലെ പ്രദർശനം കാണാൻ അവിടെയെത്തി ചേർന്നിരുന്നു.

ആദർശ് സുകുമാരനും പോൾസൺ സ്കറിയയും ചേർന്ന് തിരക്കഥ തയ്യാറാക്കിയ ഈ ഫാമിലി ഡ്രാമ സംവിധാനം ചെയ്തിരിക്കുന്നത് ജിയോ ബേബിയാണ്. മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമ്മിച്ച ഈ ചിത്രം കേരളത്തിൽ റിലീസ് ചെയ്തിരിക്കുന്നത് ദുൽഖർ സൽമാന്റെ വേഫെറെർ ഫിലിംസ് ആണ്. തെന്നിന്ത്യൻ സൂപ്പർ നായികാ താരമായ ജ്യോതികയാണ് ഈ ചിത്രത്തിലെ പ്രധാന സ്ത്രീ കഥാപാത്രത്തിന് ജീവൻ നൽകിയത്. മാത്യു ദേവസ്സി എന്ന കഥാപാത്രമായി മമ്മൂട്ടിയെത്തുന്ന കാതലിൽ അദ്ദേഹത്തിന്റെ ഭാര്യ കഥാപാത്രമായി ഓമന എന്ന പേരിലാണ് ജ്യോതികയെത്തിയിരിക്കുന്നത്. ഫ്രാൻസിസ് ലൂയിസ് എഡിറ്റിംഗ് നിർവഹിച്ച ഈ ചിത്രത്തിന് കാമറ ചലിപ്പിച്ചത് സാലു കെ തോമസും സംഗീതമൊരുക്കിയത് മാത്യൂസ് പുളിക്കനുമാണ്.