മെഗാ സ്റ്റാറിന്റെ ഗാംഗ്സ്റ്ററിനു രണ്ടാം ഭാഗം; വെളിപ്പെടുത്തി ആഷിഖ് അബു

മെഗാ സ്റ്റാർ മമ്മൂട്ടിയെ നായകനാക്കി 2014 ഇൽ ആഷിഖ് അബു സംവിധാനം ചെയ്ത ചിത്രമായിരുന്നു ഗ്യാങ്സ്റ്റർ. അഹമ്മദ് സിദ്ദിഖ്, അഭിലാഷ് എസ് കുമാർ എന്നിവർ ചേർന്ന് രചിച്ച ഈ ചിത്രം നിർമ്മിച്ചതും ആഷിഖ് അബു ആയിരുന്നു. ഇപ്പോഴിതാ മമ്മൂട്ടിയെ തന്നെ നായകനാക്കി ഈ ചിത്രത്തിന്റെ രണ്ടാം ഭാഗം ഒരുക്കാനുള്ള തയ്യാറെടുപ്പിലാണ് താനെന്നു ആഷിഖ് അബു പറയുന്നു. കുറച്ചു നാൾ മുൻപ് നടന്ന ഒരു മാധ്യമ അഭിമുഖത്തിലാണ് ആഷിഖ് അബു ഈ കാര്യം വെളിപ്പെടുത്തിയത്. ഈ ചിത്രം രചിക്കുന്നത് സൂപ്പർ ഹിറ്റ് രചയിതാവ് ശ്യാം പുഷ്ക്കരൻ ആണെന്നും ആഷിഖ് അബു പറഞ്ഞു. ഈ മമ്മൂട്ടി ചിത്രം കൂടാതെ, ബോളിവുഡ് സൂപ്പർ താരമായ ഷാരൂഖ് ഖാനെ നായകനാക്കി ഒരു ചിത്രവും തങ്ങൾ പ്ലാൻ ചെയ്യുന്നുണ്ടെന്നും ആഷിഖ് അബു പുറത്ത് വിട്ടു. ഷാരൂഖ് ഖാനോട് ഒരു കഥ പറഞ്ഞിട്ടുണ്ടെന്നും, അത് വികസിപ്പിക്കാനും തിരക്കഥയാക്കാനും സമയമാവശ്യമാണെന്നും ആഷിഖ് അബു പറയുന്നു.

കോവിഡ് പ്രതിസന്ധി വന്നതോടെ തനിക്കും ഷാരൂഖ് ഖാനും ശ്യാം പുഷ്കരനുമെല്ലാം നേരത്തെ കമ്മിറ്റ് ചെയ്ത ജോലികൾ തീർക്കാൻ സാധിക്കാതെ പോയെന്നും അത്കൊണ്ട് തന്നെ അതെല്ലാം തീർത്തതിന് ശേഷം മാത്രമേ ഈ ചിത്രങ്ങളുടെ പണിപ്പുരയിലേക്കു കടക്കാൻ സാധിക്കു എന്നും ആഷിക് അബു പറഞ്ഞു. എന്തായാലും ഈ ചിത്രങ്ങൾ തീർച്ചയായും സംഭവിക്കുമെന്നും അദ്ദേഹം വെളിപ്പെടുത്തി. ടോവിനോ തോമസ് നായകനായ നാരദൻ ആയിരുന്നു ആഷിഖ് അബുവിന്റെ ഏറ്റവുമവസാനം റിലീസ് ചെയ്ത ചിത്രം. അദ്ദേഹം ഇപ്പോൾ സംവിധാനം ചെയ്യുന്നത് ടോവിനോ തോമസ് തന്നെ നായകനായ നീലവെളിച്ചം എന്ന ചിത്രമാണ്.