പ്രതീക്ഷകൾ ഉയർത്തി മമ്മൂട്ടി ചിത്രം ‘അബ്രഹാമിന്റെ സന്തതികൾ’ ചിത്രീകരണം ആരംഭിച്ചു

കസബയ്ക്ക് ശേഷം മമ്മൂട്ടി വീണ്ടും പോലീസ് ഓഫീസറുടെ വേഷത്തില്‍ എത്തുന്ന ചിത്രമാണ് ‘അബ്രഹാമിന്റെ സന്തതികൾ’. ചിത്രത്തിന്റെ പൂജയും സ്വിച്ച് ഓൺ കർമ്മവും കൊച്ചിയിൽ നടന്നു. ബി. ഉണ്ണികൃഷ്‌ണൻ, ജോഷി, സിബി മലയിൽ, സിദ്ദിഖ്, അരുൺ ഗോപി, വൈശാഖ്, ഉദയ്‌കൃഷ്‌ണ, കലാഭവൻ ഷാജോൺ തുടങ്ങിയവർ ചടങ്ങിൽ സന്നിഹിതരായിരുന്നു.

ഇരുപത് വര്‍ഷത്തിലധികമായി സഹസംവിധായകനായി ജോലിചെയ്തുവരുന്ന ഷാജി പാടൂര്‍ സ്വതന്ത്ര സംവിധായകനാകുന്ന ആദ്യ ചിത്രമാണ് ‘അബ്രഹാമിന്റെ സന്തതികൾ’. ഗ്രേറ്റ് ഫാദർ എന്ന ചിത്രത്തിന്റെ സംവിധായകനായിരുന്ന ഹനീഫ് അദേനിയാണ് അബ്രഹാമിന്റെ സന്തതികള്‍ക്ക് തിരക്കഥ രചിച്ചിരിക്കുന്നത്. ‘ഒരു പൊലീസ് കഥ’ എന്ന ടാഗ്ലൈനില്‍ ഒരുങ്ങുന്ന ചിത്രത്തിൽ കനിഹ, സിദ്ധിഖ്, അൻസൻ പോൾ എന്നിവർ പ്രധാനവേഷങ്ങൾ കൈകാര്യം ചെയ്യുന്നു.

കസബ എന്ന ചിത്രത്തിൽ നിന്നും വ്യത്യസ്‌തമായി കൂടുതൽ ആക്ഷൻ രംഗങ്ങളും മറ്റും ഉൾക്കൊള്ളിച്ചാണ് മമ്മൂട്ടി അവതരിപ്പിക്കുന്ന കഥാപാത്രം എത്തുകയെന്ന് സംവിധായകൻ മുൻപ് വ്യക്തമാക്കിയിരുന്നു. ഗുഡ്വില്‍ എന്റര്‍ടെയ്ന്‍മെന്റ്സിന്റെ ബാനറില്‍ ജോബി ജോര്‍ജ്ജാണ് ‘അബ്രഹാമിന്റെ സന്തതികൾ’ നിര്‍മ്മിക്കുന്നത്. ആൽബി ഛായാഗ്രഹണം നിർവഹിക്കുന്ന ചിത്രത്തിലെ ഗാനങ്ങൾക്ക് ഗോപി സുന്ദറാണ് സംഗീതം ഒരുക്കുന്നത്. മമ്മൂട്ടിയുടെ വിഷു റിലീസ് ആയി ഈ ചിത്രം എത്തുമെന്നാണ് പ്രതീക്ഷിക്കപ്പെടുന്നത്.