തന്റെ ലാലുവിന് ജന്മദിന ആശംസകളുമായി മമ്മുക്ക..!

മോഹൻലാൽ- മമ്മൂട്ടി എന്നെ താര ദ്വന്ദങ്ങളെ ചുറ്റി മലയാള സിനിമാ തിരിയാൻ തുടങ്ങിയിട്ട് ഇപ്പോൾ 35 ഓളം വർഷങ്ങളായി. ഇന്നും മലയാളികൾ ഏറ്റവുമധികം സ്നേഹിക്കുന്നതും ആരാധിക്കുന്നതും അവർ ഏട്ടൻ എന്നും ഇക്ക എന്നും വിളിക്കുന്ന ഈ രണ്ടു താര സൂര്യന്മാരെ ആണ്. മലയാളികൾ ഇരട്ട ചങ്കുള്ളവർ ആണെന്നും അതിൽ ഒരു ഹൃദയം മോഹൻലാലിന് വേണ്ടി ഇടിക്കുമ്പോൾ മറു ഹൃദയം മമ്മൂട്ടിക്ക് വേണ്ടി ഇടിക്കും എന്ന് സംവിധായകൻ ഫാസിൽ ഒരിയ്ക്കൽ പറഞ്ഞിട്ടുണ്ട്. ഒരുപക്ഷെ ഇന്ത്യൻ സിനിമയിൽ തന്നെ ഏറ്റവും കൂടുതൽ സിനിമകളിൽ ഒരുമിച്ചു അഭിനയിച്ചിട്ടുള്ള ഒരു ഇന്ഡസ്ട്രിയിലെ സൂപ്പർ താരങ്ങൾ ഇവർ ആയിരിക്കും. സിനിമയ്ക്കു പുറത്തും വലിയ സൗഹൃദം സൂക്ഷിക്കുന്നവരാണ് ഇവർ രണ്ടു പേരും.

ഇപ്പോഴിതാ തന്റെ പ്രീയപ്പെട്ട ലാലുവിന് ജന്മദിന ആശംസകളുമായി രംഗത്ത് വന്നിരിക്കുകയാണ് മമ്മൂട്ടി. മോഹൻലാലിനെ സ്വന്തം കുടുംബാംഗത്തെ പോലെ കാണുന്ന മമ്മുക്കയെ മോഹൻലാൽ വിളിക്കുന്നത് ഇച്ചാക്ക എന്നാണ്. അദ്ദേഹത്തിന്റെ കുടുംബാംഗങ്ങൾ മാത്രം വിളിക്കുന്ന ആ പേര് സിനിമാ ലോകത്തു നിന്ന് അദ്ദേഹത്തെ വിളിക്കുന്ന ഒരേ ഒരാൾ ആണ് മോഹൻലാൽ എന്നതും അവരുടെ ശ്കതമായ സൗഹൃദത്തെ കാണിച്ചു തരുന്നു. എല്ലാ വർഷവും പരസ്പരം മുടങ്ങാതെ ജന്മദിന ആശംസകൾ അറിയിക്കുന്ന ഇരുവരും പല ആഘോഷങ്ങളും കുടുബങ്ങളുമായി ഒരുമിച്ചാണ് ആഘോഷിക്കാറുള്ളതും. ഇവരുടെ സൗഹൃദത്തെ പറ്റി ഈ അടുത്തിടെ ദുൽഖർ സൽമാൻ പറഞ്ഞതും വൈറൽ ആയിരുന്നു. ഇനി എന്നാണ് ഇവർ ഒരുമിച്ചു ഒരിക്കൽ കൂടി വെള്ളിത്തിരയിൽ എത്തുന്നത് എന്നറിയാൻ കാത്തിരിക്കുകയാണ് മലയാളി സിനിമാ പ്രേക്ഷകർ. അങ്ങനെയൊരു ചിത്രം ഉടൻ വരും എന്ന് തന്നെയാണ് ഏവരുടെയും പ്രതീക്ഷ.