ഞങ്ങൾക്ക് കോടികളുടെ ക്ലബ്ബുകളിൽ അല്ല കയറേണ്ടത്, 3 കോടി 35 ലക്ഷം ജനങ്ങളുടെ മനസ്സിലാണ് കയറേണ്ടത്: മമ്മൂട്ടി

മെഗാ സ്റ്റാർ മമ്മൂട്ടി നായകനായ മധുര രാജ എന്ന ചിത്രം നാളെ റീലീസ് ചെയ്യുകയാണ്. പുലിമുരുകൻ എന്ന മോഹൻലാൽ നായകനായ ബ്രഹ്മാണ്ഡ ഹിറ്റിന് ശേഷം വൈശാഖ് ഒരുക്കിയ ഈ മാസ്സ് മസാല ചിത്രം കേരളത്തിലെ ഇരുനൂറിന് മുകളിൽ തീയേറ്ററിൽ നാളെ റീലീസ് ചെയ്യും. നൂറിന് മുകളിൽ ഫാൻസ് ഷോകളും ഈ ചിത്രത്തിന് വേണ്ടി മമ്മൂട്ടി  ആരാധകർ ഒരുക്കിയിട്ടുണ്ട്. ഈ ചിത്രത്തിന്റെ പ്രീ റീലീസ് ലോഞ്ച് ഇന്നലെ എറണാകുളത് നടന്നു. അവിടെ വെച്ച് മെഗാ സ്റ്റാർ മമ്മൂട്ടി പറഞ്ഞ വാക്കുകൾ ആണ് ഇപ്പോൾ സോഷ്യൽ മീഡിയയിൽ വൈറൽ ആവുന്നത്.

മധുര രാജ എന്ന തന്റെ ചിത്രം കോടി ക്ലബ്ബുകളിൽ ഇടം നേടണം എന്നു ആഗ്രഹം ഇല്ല എന്നും മൂന്നു കോടി 35 ലക്ഷം വരുന്ന മലയാളി പ്രേക്ഷകരുടെ മനസ്സിൽ ആണ് ഈ ചിത്രം കയറേണ്ടത് എന്നും മമ്മൂട്ടി പറയുന്നു. ഉദയ കൃഷ്ണ തിരക്കഥ രചിച്ച ഈ ചിത്രം നിർമ്മിച്ചിരിക്കുന്നത് നെൽസൺ ഐപ്പ് ആണ്. മമ്മൂട്ടിയോടൊപ്പം വലിയ താര നിര ആണ് ഈ ചിത്രത്തിൽ അണി നിരന്നിരിക്കുന്നത്. തമിഴ് യുവ താരം ജയ്,  തെലുങ്കു താരം ജഗപതി ബാബു എന്നിവർ അഭിനയിക്കുന്ന ഈ ചിത്രത്തിൽ അനുശ്രീ, മഹിമ നമ്പ്യാർ, ഷംന കാസിം, അന്ന രാജൻ എന്നിവരും അഭിനയിക്കുന്നുണ്ട്. പീറ്റർ ഹെയ്ൻ സംഘട്ടനം ഒരുക്കിയ ഈ ചിത്രത്തിന് ഗാനങ്ങൾ ഒരുക്കിയിരിക്കുന്നത് ഗോപി സുന്ദർ ആണ്. ഷാജി കുമാർ ആണ് മധുര രാജയുടെ ക്യാമറാമാൻ.