മലയാളത്തിൽ ഇതാദ്യം; മൈൻഡ് ഗെയിം ത്രില്ലർ ചെയ്യാൻ മെഗാസ്റ്റാർ; കൂടുതൽ വിവരങ്ങളിതാ

മലയാളത്തിന്റെ മെഗാസ്റ്റാർ മമ്മൂട്ടി ഇപ്പോൾ അഭിനയിച്ചു കൊണ്ടിരിക്കുന്നത് പ്രശസ്ത ഛായാഗ്രാഹകനായ റോബി വർഗീസ് രാജ് ഒരുക്കുന്ന ചിത്രത്തിലാണ്. ത്രില്ലറായി ഒരുക്കുന്ന ഈ ചിത്രത്തിന്റെ പേര് കണ്ണൂർ സ്‌ക്വാഡ് എന്നാണെന്നു വാർത്തകൾ വന്നിരുന്നു. മമ്മൂട്ടി ഒരു പോലീസ് ഓഫീസറായി അഭിനയിക്കുന്ന ഈ ചിത്രത്തിന്റെ പുതിയ ഷെഡ്യൂൾ ഇപ്പോൾ പൂനയിൽ ആണ് നടക്കുന്നത്. മമ്മൂട്ടി കമ്പനി എന്ന തന്റെ നിർമ്മാണ ബാനറിൽ മമ്മൂട്ടി തന്നെ നിർമ്മിക്കുന്ന ഈ ചിത്രം, ഈ ബാനറിൽ ഇതുവരെ ഒരുക്കിയതിൽ ഏറ്റവും വലിയ ചിത്രം കൂടിയാണ്. മമ്മൂട്ടിക്കൊപ്പം സണ്ണി വെയ്ൻ, ഷറഫുദീൻ, അസീസ് നെടുമങ്ങാട്, ഗായത്രി അരുൺ എന്നിവരും വേഷമിടുന്ന ഈ ചിത്രത്തിന് രചന നിർവഹിച്ചത് പ്രശസ്ത നടനായ റോണി ഡേവിഡ് രാജ് ആണ്. എന്നാലിപ്പോൾ ഈ ചിത്രത്തിന് ശേഷം മമ്മൂട്ടി ചെയ്യാൻ പോകുന്ന സിനിമയെ കുറിച്ചുള്ള ചില വിവരങ്ങളാണ് സോഷ്യൽ മീഡിയയിൽ പ്രചരിക്കുന്നത്.

പ്രമുഖ തിരക്കഥാകൃത്ത് കലൂര്‍ ഡെന്നിസിന്റെ മകന്‍ ഡിനു ഡെന്നിസ് സംവിധാനം ചെയ്യുന്ന ചിത്രത്തിലാണ് ഇനി മമ്മൂട്ടി അഭിനയിക്കാൻ പോകുന്നതെന്നാണ് സൂചന. ഈ കഴിഞ്ഞ വർഷം പ്രഖ്യാപിച്ച ഈ പ്രൊജക്റ്റ് നിർമ്മിക്കാൻ പോകുന്നത് തീയേറ്റർ ഓഫ് ഡ്രീംസിന്റെ ബാനറിൽ ജിനു എബ്രഹാം, ഡോൾവിൻ കുര്യാക്കോസ്, ഡാർവിൻ കുര്യാക്കോസ് എന്നിവരാണ്. പ്രശസ്ത ഛായാഗ്രാഹകൻ നിമിഷ് രവിയാണ് ഈ ചിത്രത്തിന് വേണ്ടി ഛായാഗ്രഹണം നിർവഹിക്കുക. ഒരു മൈൻഡ് ഗെയിം ത്രില്ലറായാണ് ഈ ചിത്രമൊരുക്കുന്നതെന്നാണ് ഇപ്പോൾ ലഭിക്കുന്ന വിവരങ്ങൾ പറയുന്നത്. ഈ ചിത്രത്തിന്റെ ഒഫീഷ്യൽ പ്രഖ്യാപനം വൈകാതെ ഉണ്ടാവുമെന്നാണ് വാർത്തകൾ വരുന്നത്. ജിയോ ബേബി ഒരുക്കിയ കാതൽ ആണ് മമ്മൂട്ടിയുടെ അടുത്ത റിലീസ്.