നായർ സാബ്, കോട്ടയം കുഞ്ഞച്ചൻ, ന്യൂ ഡൽഹി സൂപ്പർ ഹിറ്റ് ടീം വീണ്ടും ഒന്നിക്കുന്നു..!!

മലയാള സിനിമയിലെ എക്കാലത്തെയും മികച്ച തിരക്കഥാകൃത്തുകളിൽ ഒരാളാണ് ഡെന്നിസ് ജോസഫ്. മലയാള സിനിമയുടെ സുവർണ്ണ കാലഘട്ടത്തിൽ പകരം വെക്കാൻ സാധിക്കാത്ത ഒട്ടനവധി തിരക്കഥകൾ രചിച്ച വ്യക്തി കൂടിയാണ് അദ്ദേഹം. മോഹൻലാൽ എന്ന നടനെ സൂപ്പർസ്റ്റാറാക്കിയ രാജാവിന്റെ മകൻ എന്ന ചിത്രത്തിന് വേണ്ടി തിരക്കഥ ഒരുക്കിയിരുന്നത് ഡെന്നിസ് തന്നെയായിരുന്നു. മോഹൻലാലിനെ സൂപ്പർസ്റ്റാർ ആക്കിയത് പോലെ തന്നെ മമ്മൂട്ടിയെ മെഗാസ്റ്റാറാക്കിയ ന്യൂ ഡൽഹി എന്ന ചിത്രത്തിന് വേണ്ടി തിരക്കഥ രചിച്ചതും അദ്ദേഹം തന്നെയായിരുന്നു. 80കളിലും 90കളിയും ഒരുപാട് സൂപ്പർഹിറ്റ് ചിത്രങ്ങൾ അദ്ദേഹത്തിന്റെ തൂലികയിൽ നിന്ന് പൊഴിഞ്ഞിട്ടുണ്ട്. പിന്നീട് ഒരുപാട് കാലം മലയാള സിനിമയിൽ നിന്ന് വിട്ട് നിന്ന ഡെന്നിസ് ഇടക്കാലത്ത് ഒരു തിരിച്ചു വരവും നടത്തിയിരുന്നു. പ്രിയദർശൻ ചിത്രമായ ‘ഗീതാഞ്ജലി’ യുടെ തിരക്കഥ രചനയിൽ ഡെന്നിസും ഭാഗമായിരുന്നു. സ്വതന്ത്ര രചനയിലൂടെ വമ്പൻ തിരിച്ചു വരവ് നടത്താൻ ഒരുങ്ങുകയാണ് ഡെന്നിസ് ജോസഫ്.

മമ്മൂട്ടി ചിത്രത്തിന് വേണ്ടിയാണ് ഡെന്നിസ് ഇത്തവണ തിരക്കഥ ഒരുക്കുന്നത്. പ്രമോദ് പപ്പനായിരിക്കും ചിത്രം സംവിധാനം ചെയ്യുന്നത്. ഈസ്റ്റർ ദിനത്തിൽ ജോബി ജോർജാണ് ഈ ഞെട്ടിക്കുന്ന പ്രഖ്യാപനം സമൂഹ മാധ്യമങ്ങളിൽ നടത്തിയത്. ചിത്രത്തിന് കുറിച്ചു കൂടുതൽ വിവരങ്ങൾ അടുത്ത് തന്നെ പുറത്തുവിടും എന്നാണ് റിപ്പോർട്ടുകൾ സൂചിപ്പിക്കുന്നത്. ഡെന്നിസിന്റെ തിരിച്ചു വരവ് സിനിമ പ്രേമികളെ ആവേശഭരിതരാക്കിയിരിക്കുകയാണ്. നിറക്കൂട്ട്, ശ്യാമ, സംഘം, നായർ സാബ്, ഭൂമിയിലെ രാജാക്കന്മാർ, കോട്ടയം കുഞ്ഞച്ചൻ, ഇന്ദ്രജാലം, ആകാശദൂത്, എഫ്.ഐ.ആർ തുടങ്ങിയ വമ്പൻ ചിത്രങ്ങൾക്ക് വേണ്ടി തിരക്കഥ രചിച്ച വ്യക്തിയാണ് ഡെന്നിസ് ജോസഫ്.