നാല്പത്തിയൊമ്പതാമത്‌ ഇന്ത്യൻ രാജ്യാന്തര ചലച്ചിത്ര മേളയിലേക്കു മമ്മൂട്ടി ചിത്രം പേരൻപ് തിരഞ്ഞെടുക്കപ്പെട്ടു; ചിത്രത്തിന്റെ റിലീസും ഉടൻ..!

മെഗാസ്റ്റാർ മമ്മൂട്ടിയുടെ തമിഴ് ചിത്രമായ പേരൻപ് റിലീസ് ആവുന്നത് കാത്തിരിക്കുകയാണ് മമ്മൂട്ടി ആരാധകരും സിനിമാ പ്രേമികളും. ദേശീയ അവാർഡ് നേടിയ ചിത്രങ്ങൾ ഒരുക്കിയ റാം സംവിധാനം ചെയ്ത ഈ ചിത്രം അധികം വൈകാതെ തന്നെ തീയേറ്ററുകളിൽ എത്തുമെന്നാണ് പ്രതീക്ഷ. റിലീസിന് മുൻപേ തന്നെ ഇന്റർനാഷണൽഫിലിം ഫെസ്റ്റിവലുകളിൽ പ്രദർശിപ്പിച്ചു ഏറെ അഭിനന്ദനം നേടിയ ചിത്രമാണ് പേരൻപ്. മമ്മൂട്ടിയുടേയും സാധന എന്ന നടിയുടെയും ഗംഭീര പ്രകടനമാണ് ഈ ചിത്രത്തിന്റെ സവിശേഷത എന്നാണ് ചിത്രം കണ്ട പലരുടെയും അഭിപ്രായം. ഈ ചിത്രത്തിന്റെ ടീസറുകളും ഗാനങ്ങളും ഏറെ ശ്രദ്ധ നേടിയെടുത്തിരുന്നു. ഇപ്പോഴിതാ ഈ ചിത്രം നാല്പത്തിയൊമ്പതാമത്‌ ഇന്ത്യൻ ഇന്റർനാഷണൽ ഫിലിം ഫെസ്റ്റിവലിലേക്കു തിരഞ്ഞെടുക്കപ്പെട്ടിരിക്കുകയാണ്.

നാല് തമിഴ് ചിത്രങ്ങൾ ആണ് ഇത്തവണ ഇന്ത്യൻ രാജ്യാന്തര ഫിലിം ഫെസ്റ്റിവലിൽ പ്രദർശിപ്പിക്കുക. അതിലൊന്ന് പേരൻപ് ആയിരിക്കും. ഇതിനു മുൻപ് റോട്ടർഡാം ചലച്ചിത്രമേള, ഷാങ്ങ്ഹായ് ചലച്ചിത്രമേള എന്നിവിടങ്ങളിൽ നിന്ന് മികച്ച നിരൂപക- പ്രേക്ഷക പ്രശംസ ഈ ചിത്രം നേടിയെടുത്തിരുന്നു. വിദേശത്തു ടാക്സി ഡ്രൈവർ ആയി ജോലി ചെയ്യുന്ന അമുദൻ എന്ന ഒരു അച്ഛന്റെ കഥാപാത്രമാണ് മമ്മൂട്ടി ഈ ചിത്രത്തിൽ അവതരിപ്പിക്കുന്നത്. ശ്രീ രാജലക്ഷ്മി ഫിലിമ്സിന്റെ ബാനറിൽ പി എൽ തേനപ്പൻ നിർമ്മിച്ച ഈ ചിത്രത്തിൽ മമ്മൂട്ടിയോടൊപ്പം അഞ്ജലി, സുരാജ് വെഞ്ഞാറമൂട്, ബേബി സാധന, സമുദ്രക്കനി എന്നിവരും അഭിനയിച്ചിട്ടുണ്ട്. യുവാൻ ശങ്കർ രാജ സംഗീതം പകർന്നിരിക്കുന്ന ഈ ചിത്രത്തിന് എഡിറ്റിംഗ് നിർവഹിച്ചത് ശ്രീകർ പ്രസാദ് ആണ്. ഒരു അച്ഛനും സുഖമില്ലാത്ത അദ്ദേഹത്തിന്റെ മകളും തമ്മിലുള്ള ആത്മ ബന്ധമാണ് ഈ ചിത്രത്തിലൂടെ അവതരിപ്പിക്കുന്നത്.