മരക്കാരിനു ശേഷം സോഷ്യൽ മീഡിയ കീഴടക്കാൻ മെഗാ സ്റ്റാറിന്റെ വണ്ണിന്റെ പുതിയ ടീസർ എത്തുന്നു

മെഗാ സ്റ്റാർ മമ്മൂട്ടി നായകനായ പുതിയ ചിത്രമായ വണ്ണിന്റെ ആദ്യ ടീസർ വലിയ പ്രേക്ഷക ശ്രദ്ധ നേടിയിരുന്നു. ഇപ്പോഴിതാ ഈ ചിത്രത്തിന്റെ രണ്ടാം ടീസർ നാളെയെത്തുകയാണ്. ഇന്ന് സോഷ്യൽ മീഡിയ ഭരിച്ചത് മോഹൻലാലിന്റെ മരക്കാർ ട്രെയ്‌ലറാണെങ്കിൽ നാളെ സോഷ്യൽ മീഡിയ ഭരിക്കാൻ പോകുന്നത് വൺ ടീസർ ആയിരിക്കുമെന്നാണ് ആരാധകരുടേയും സിനിമാ പ്രേമികളുടേയും പ്രതീക്ഷ. ബോബി- സഞ്ജയ് ടീം രചിച്ചു ഇച്ചായീസ് പ്രൊഡക്ഷൻസ് നിർമ്മിച്ച ഈ ചിത്രം സംവിധാനം ചെയ്തിരിക്കുന്നത് സന്തോഷ് വിശ്വനാഥാണ്. മമ്മൂട്ടിയുടെ കിടിലൻ ഡയലോഗുകളായിരുന്നു ആദ്യ ടീസറിന്റെ സവിശേഷത. രണ്ടാം ടീസറിലും മമ്മൂട്ടി എന്ന നടന്റെ കിടിലൻ രംഗങ്ങൾ കാണുമെന്നു തന്നെയാണ് ഏവരും പ്രതീക്ഷിക്കുന്നത്. കടക്കൽ ചന്ദ്രനെന്നു പേരുള്ള കേരളാ മുഖ്യമന്ത്രിയായാണ് മമ്മൂട്ടി ഈ ചിത്രത്തിൽ പ്രത്യക്ഷപ്പെടുന്നത്.

മമ്മൂട്ടിയെ കൂടാതെ ഒരു വലിയ താരനിര തന്നെ അണിനിരക്കുന്ന ഈ ചിത്രത്തിലെ മറ്റഭിനേതാക്കൾ ജോജു ജോര്‍ജ്, നിമിഷ സജയന്‍, സംവിധായകന്‍ രഞ്ജിത്ത്, സലിം കുമാര്‍, മുരളി ഗോപി, ബാലചന്ദ്രമേനോന്‍, ശങ്കര്‍ രാമകൃഷ്ണന്‍, മാമുക്കോയ, ശ്യാമപ്രസാദ്, രമ്യ, അലന്‍സിയര്‍ ലെ ലോപ്പസ്, സുരേഷ് കൃഷ്ണ, മാത്യു തോമസ്, ജയകൃഷ്ണന്‍, മേഘനാഥന്‍, സുദേവ് നായര്‍, മുകുന്ദന്‍, സുധീര്‍ കരമന, ബാലാജി, ജയന്‍ ചേര്‍ത്തല, ഗായത്രി അരുണ്‍, രശ്മി ബോബന്‍, വി കെ ബൈജു, നന്ദു,വെട്ടുകിളി പ്രകാശ്, ഡോക്ടര്‍ റോണി, സാബ് ജോണ്‍, ഡോക്ടര്‍ പ്രമീള ദേവി, അര്‍ച്ചന മനോജ്, കൃഷ്ണ എന്നിവരാണ്. ഗോപി സുന്ദർ സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിച്ചത് വൈദി സോമസുന്ദരമാണ്. ഒരു പൊളിറ്റിക്കൽ ഡ്രാമയായാണ് ഈ ചിത്രമൊരുക്കിയിരിക്കുന്നതെന്ന സൂചനയാണ് ഇതിന്റെ ടീസർ, പോസ്റ്ററുകളെന്നിവ തരുന്നത്.