കുശാഗ്ര ബുദ്ധിയുമായി സേതുരാമയ്യർ നാളെ മുതൽ; കേരളത്തിൽ വമ്പൻ റിലീസ്..!

മെഗാ സ്റ്റാർ മമ്മൂട്ടി നായകനായി എത്തുന്ന സിബിഐ 5 ദി ബ്രെയിൻ എന്ന ചിത്രം നാളെ മുതൽ ലോകം മുഴുവൻ റിലീസ് ചെയ്യുകയാണ്. കഴിഞ്ഞ ദിവസം ഇതിന്റെ ട്രൈലെർ ബുർജ് ഖലീഫയിൽ പ്രദർശിപ്പിച്ചു വലിയ ശ്രദ്ധ നേടിയിരുന്നു. കേരളത്തിൽ വലിയ റിലീസ് ആയി എത്തുന്ന ഈ ചിത്രം ആഗോള തലത്തിലും മികച്ച റിലീസ് ആണ് നേടിയിരിക്കുന്നത്. വലിയ പ്രതീക്ഷകളോടെ പ്രേക്ഷകർ കാത്തിരിക്കുന്ന ചിത്രമാണ് സിബിഐ 5 ദി ബ്രെയിൻ. കുശാഗ്ര ബുദ്ധിക്കാരനായ സേതുരാമയ്യർ എന്ന സിബിഐ ഓഫീസർ ആയി പതിനേഴു വർഷത്തിന് ശേഷമാണു മമ്മൂട്ടി എത്തുന്നത്. ഇതിനു മുൻപ് നാലു തവണ ഇതേ കഥാപാത്രമായി പ്രേക്ഷകരുടെ മുന്നിലെത്തി കയ്യടി നേടിയിട്ടുള്ള ആളാണ് അദ്ദേഹം. എസ് എൻ സ്വാമി രചിച്ചു കെ മധു സംവിധാനം ചെയ്ത ഈ സീരിസിലെ അഞ്ചാമത്തെ ചിത്രം നിർമ്മിച്ചിരിക്കുന്നത് സ്വർഗ്ഗചിത്രയുടെ ബാനറിൽ അപ്പച്ചൻ ആണ്.

രഞ്ജി പണിക്കർ, സായ്കുമാർ, സൗബിൻ ഷാഹിർ, മുകേഷ്, അനൂപ് മേനോൻ,ദിലീഷ് പോത്തൻ, രമേശ് പിഷാരടി, പ്രതാപ് പോത്തൻ, സന്തോഷ് കീഴാറ്റൂർ, അസീസ് നെടുമങ്ങാട്, ഹരീഷ് രാജു, ഇടവേള ബാബു, ആശാ ശരത്ത്, കനിഹ, മാളവിക മേനോൻ, അൻസിബ, മാളവിക നായർ, മായാ വിശ്വനാഥ്, സുദേവ് നായർ, പ്രശാന്ത് അലക്സാണ്ടർ, രമേശ് കോട്ടയം, ജയകൃഷ്ണൻ, സ്വാസിക, സുരേഷ് കുമാർ, ചന്തു കരമന, സ്മിനു ആർട്ടിസ്റ്റ്, സോഫി എം ജോ, തണ്ടൂർ കൃഷ്ണ തുടങ്ങി വലിയൊരു താരനിര അണിനിരക്കുന്ന ചിത്രം കൂടിയാണിത്. ഒരു സിബിഐ ഡയറി കുറിപ്പ്, ജാഗ്രത, സേതുരാമയ്യർ സിബിഐ, നേരറിയാൻ സിബിഐ എന്നിവയാണ് ഈ സീരിസിലെ മറ്റു നാലു ചിത്രങ്ങൾ.