റിലീസിന് മുന്നേ ലൂസിഫർ കാണാൻ മെഗാസ്റ്റാർ; ചിത്രം ഇഷ്ട്ടപ്പെട്ടാൽ തനിക്ക് ഒരു ഡേറ്റ് നൽകണമെന്ന് പൃഥ്വിരാജ്…

മോഹൻലാൽ നായകനായി എത്തുന്ന പൃഥ്വിരാജ് ചിത്രമായ ലുസിഫെർ മാർച്ചു 28 ന് റീലീസ് ചെയ്യാൻ പോവുകയാണ്. ചിത്രത്തിൻറെ ട്രയ്ലർ ഇപ്പോൾ സോഷ്യൽ മീഡിയയിൽ തരംഗം സൃഷ്ടിച്ചു കൊണ്ട് മുന്നേറുകയാണ്. ലുസിഫെറിന്റെ പ്രമോഷന്റെ ഭാഗമായി മോഹൻലാൽ, പൃഥ്വിരാജ് എന്നിവർ കഴിഞ്ഞ ദിവസങ്ങളിൽ ഗൾഫിലും എത്തിയിരുന്നു. അവിടെ വെച്ചു കൈരളി ടിവിയുടെ ഒരു സ്റ്റേജ് പ്രോഗ്രാമിലും ലുസിഫെർ ടീം പങ്കെടുത്തു. മമ്മൂട്ടിയും ആ പ്രോഗ്രാമിൽ അതിഥി ആയി എത്തിയിരുന്നു. അവിടെ വെച്ചു പൃഥ്വിരാജ് പറഞ്ഞ ഒരു കാര്യവും അതിനു മമ്മൂട്ടി പറഞ്ഞ മറുപടിയും ഇപ്പോൾ സോഷ്യൽ മീഡിയയിൽ വൈറൽ ആവുകയാണ്.

റിലീസിനു മുൻപ് തന്നെ തന്റെ ആദ്യ സംവിധാന സംരംഭമായ ലുസിഫെർ കാണണം എന്ന് താൻ ആവശ്യപ്പെട്ടത് മമ്മുക്കയോട് മാത്രം ആണെന്നും മമ്മുക്ക ചിത്രം കാണും എന്നാണ് തന്റെ പ്രതീക്ഷ എന്നും പൃഥ്വിരാജ് പറയുന്നു. താൻ ചിത്രം കാണും എന്നു മമ്മൂട്ടി തലയാട്ടി കൊണ്ട് മറുപടി പറയുകയും ചെയ്തു. ചിത്രം ഇഷ്ട്ടപ്പെട്ടാൽ തനിക്ക് ഒരു ഡേറ്റ് നൽകണം എന്നും പൃഥ്വി പറഞ്ഞപ്പോൾ ഡേറ്റ് ഒക്കെ എപ്പോഴേ നൽകി എന്നും മമ്മൂട്ടി പറഞ്ഞു. മമ്മൂട്ടിയുടെ വിഷു ചിത്രമായ മധുര രാജയും വലിയ വിജയം ആയി മാറട്ടെ എന്നു മോഹൻലാലും ആശംസിച്ചു. മമ്മുക്ക ലുസിഫെർ ചിത്രത്തെ കുറിച്ചു സ്റ്റേജിൽ പറഞ്ഞ വാക്കുകൾ ആണ് ഈ ചിത്രത്തെ കുറിച്ചു താൻ കേട്ട ഏറ്റവും നല്ല വാക്കുകൾ എന്നും പൃഥ്വിരാജ് പറയുന്നു. ഏതായാലും മോഹൻലാലും മമ്മൂട്ടിയും വമ്പൻ ചിത്രങ്ങളുമായി എത്തുമ്പോൾ ഈ വെക്കേഷൻ കാലം മലയാള സിനിമക്ക് വലിയ വിജയങ്ങൾ തന്നെ സമ്മാനിക്കും എന്നു കരുതാം.