ലിജോ ജോസ് പെല്ലിശ്ശേരി മാജിക് കാത്ത് ആരാധകർ; മമ്മൂട്ടിയുടെ നൻപകൽ നേരത്ത് മയക്കം റിലീസിനൊരുങ്ങുന്നു

പ്രശസ്ത സംവിധായകൻ ലിജോ ജോസ് പെല്ലിശ്ശേരി, ആദ്യമായി മലയാളത്തിന്റെ മെഗാ സ്റ്റാർ മമ്മൂട്ടിയെ നായകനാക്കി ഒരുക്കിയ നൻ പകൽ നേരത്ത് മയക്കമെന്ന ചിത്രം റിലീസിനൊരുങ്ങുകയാണ്. മമ്മൂട്ടി തന്നെ തന്റെ പുതിയ നിർമ്മാണ കമ്പനിയായ മമ്മൂട്ടി കമ്പനിയുടെ ബാനറിൽ നിർമ്മിച്ചിരിക്കുന്ന ഈ ചിത്രം കഴിഞ്ഞ മാസം നടന്ന കേരളാ അന്താരാഷ്ട്ര ചലച്ചിത്ര മേളയിൽ പ്രീമിയർ ചെയ്യുകയും മികച്ച പ്രതികരണം നേടുകയും ചെയ്തിരുന്നു. ഈ വരുന്ന ജനുവരി പത്തൊൻപതിനാണ് നൻപകൽ നേരത്ത് മയക്കം തീയേറ്ററുകളിൽ എത്തുക. വീണ്ടും ഒരു ലിജോ ജോസ് പെല്ലിശ്ശേരി മാജിക് തീയേറ്ററിൽ കാണാൻ കാത്തിരിക്കുകയാണ് ആരാധകരും സിനിമാ പ്രേമികളും. ജെയിംസ്/സുന്ദരം എന്നീ കഥാപാത്രങ്ങളായി മലയാളത്തിന്റെ മഹാനടൻ മമ്മൂട്ടി നടത്തിയ മികച്ച പ്രകടനം കാണാനും ആരാധകർ അക്ഷമയോടെയാണ് കാത്തിരിക്കുന്നത്.

പ്രശസ്ത രചയിതാവ് എസ് ഹരീഷ് രചന നിർവഹിച്ച ഈ ചിത്രത്തിന്റെ ടീസറുകൾ, പോസ്റ്റർ എന്നിവയൊക്കെ മികച്ച പ്രേക്ഷക ശ്രദ്ധയാണ് നേടിയത്. മമ്മൂട്ടിക്കൊപ്പം രമ്യാ പാണ്ട്യൻ, അശോകൻ, കൈനകരി തങ്കരാജ്, സുരേഷ് ബാബു, ചേതൻ ജയലാൽ, അശ്വന്ത് അശോക് കുമാർ, രാജേഷ് ശർമ്മ എന്നിവരും വേഷമിട്ടിരിക്കുന്ന നൻപകൽ നേരത്ത് മയക്കം, എഡിറ്റ് ചെയ്തിരിക്കുന്നത് ദീപു ജോസഫും ഇതിനു ക്യാമറ ചലിപ്പിച്ചത് തേനി ഈശ്വറും ആണ്. ദുൽഖർ സൽമാന്റെ വേഫേറെർ ഫിലിംസ് ആണ് ഈ ചിത്രം കേരളത്തിൽ വിതരണം ചെയ്തിരിക്കുന്നത്. ലിജോ ജോസ് പെല്ലിശ്ശേരി തന്നെ കഥ രചിച്ച ഈ ചിത്രം ഷൂട്ട് ചെയ്തിരിക്കുന്നത് പഴനിയിലാണ്. മലയാളത്തിലും തമിഴിലുമായാണ് ഇതിലെ സംഭാഷണങ്ങൾ ഒരുക്കിയിരിക്കുന്നത്.