ഡിറ്റക്റ്റീവ് മമ്മൂട്ടി നവംബറിലെത്തും?; ഡൊമിനിക് ആൻഡ് ദ ലേഡീസ് പേഴ്സ് റിലീസ് അപ്‌ഡേറ്റ്

മെഗാസ്റ്റാർ മമ്മൂട്ടിയെ നായകനാക്കി പ്രശസ്ത തമിഴ് സംവിധായകൻ ഗൗതം വാസുദേവ് മേനോൻ സംവിധാനം ചെയ്ത ഡൊമിനിക് ആൻഡ് ദ ലേഡീസ് പേഴ്സ് റിലീസിനൊരുങ്ങുന്നു. കഴിഞ്ഞ മാസം ഷൂട്ടിംഗ് പൂർത്തിയാക്കിയ ചിത്രം ഇപ്പോൾ അതിന്റെ പോസ്റ്റ് പ്രൊഡക്ഷൻ സ്റ്റേജിലാണ്. ഏറ്റവും പുതിയ വിവരങ്ങൾ പ്രകാരം നവംബർ മാസം അവസാന വാരത്തോടെ ചിത്രം പ്രേക്ഷകരുടെ മുന്നിലെത്തിക്കാനുള്ള ശ്രമത്തിലാണ് അണിയറ പ്രവർത്തകർ.

ചിത്രത്തിന്റെ റിലീസ് തീയതി സംബന്ധിച്ചുള്ള അപ്‌ഡേറ്റ്, ചിത്രത്തിന്റെ ആദ്യ ടീസർ എന്നിവ വൈകാതെ പുറത്തു വരുമെന്നാണ് സൂചന. മമ്മൂട്ടി ഒരു ഡിറ്റക്റ്റീവ് ആയി വേഷമിടുന്ന ചിത്രത്തിൽ കോമെടിക്കും ത്രില്ലിംഗ് മുഹൂർത്തങ്ങൾക്കും പ്രാധാന്യമുണ്ട്. ഗൗതം വാസുദേവ് മേനോൻ ആദ്യമായി മലയാളത്തിൽ സംവിധാനം ചെയ്ത ഈ ചിത്രം മമ്മൂട്ടിക്കൊപ്പമുള്ള അദ്ദേഹത്തിന്റെ ആദ്യ സംവിധാന സംരംഭം കൂടിയാണ്.

സൂരജ് ആർ, നീരജ് ആർ എന്നിവർ ചേർന്ന് രചിച്ച ഈ ചിത്രം മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമ്മിക്കുന്ന ചിത്രമാണ്. ഗോകുൽ സുരേഷ്, ലെന, സിദ്ദിഖ്, വിജി വെങ്കടേഷ്, വിജയ് ബാബു എന്നിവരാണ് ഇതിലെ മറ്റു പ്രധാന താരങ്ങൾ. കൊച്ചി, ഊട്ടി, മൂന്നാർ എന്നിവിടങ്ങളിലായി ആണ് ഈ ചിത്രം പൂർത്തിയാക്കിയത്. ചിത്രത്തിന് കാമറ ചലിപ്പിച്ചത് വിഷ്ണു ദേവ്, സംഗീതം- ദർബുക ശിവ, എഡിറ്റിംഗ് നിർവഹിച്ചത് ആന്റണി. കഴിഞ്ഞ സെപ്റ്റംബർ ഏഴിന്, മമ്മൂട്ടിയുടെ ജന്മദിനം പ്രമാണിച്ചാണ് ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത്.