51 വർഷം കൊണ്ട് 400ന് മുകളിൽ സിനിമകളുമായി ആറ് തലമുറകളെ അത്ഭുതപ്പെടുത്തിയ മമ്മൂട്ടിസം; ആഘോഷവുമായി ആരാധകർ

മലയാളത്തിന്റെ മെഗാ സ്റ്റാർ മമ്മൂട്ടി ഇന്ന് തന്റെ അഭിനയ ജിവിതത്തിന്റെ അൻപത്തിയൊന്ന് വർഷങ്ങൾ പൂർത്തിയാക്കുകയാണ്. 1971ല്‍ പുറത്തുവന്ന അനുഭവങ്ങള്‍ പാളിച്ചകളിലൂടെ മലയാള സിനിമയിലേക്ക് മമ്മൂട്ടി കടന്നു വന്നിട്ട് 51 വർഷം തികയുമ്പോൾ മമ്മൂട്ടി ആരാധകർ അത് സോഷ്യൽ മീഡിയയിൽ ആഘോഷമാക്കുകയാണ്. ട്വിറ്ററില്‍ ’51 ഇയേഴ്‌സ് ഓഫ് മമ്മൂട്ടിസം’ എന്ന ഹാഷ്ടാഗും ഉപയോഗിച്ചാണ് അവർ ഈ ദിവസം ആഘോഷിക്കുന്നത്. ജൂനിയർ ആർട്ടിസ്റ്റ് ആയി ആദ്യ ചിത്രത്തിൽ അഭിനയിച്ച മമ്മൂട്ടി ഇന്ന് മലയാള സിനിമയിലെ സൂപ്പർ താരങ്ങളിൽ ഒരാളാണ്. ഇത്രയും വർഷം കൊണ്ട് നാനൂറിനു മുകളിൽ ചിത്രങ്ങളിൽ അഭിനയിച്ച ഈ താരം, ആറോളം തലമുറകളെയാണ് തന്റെ പ്രതിഭ കൊണ്ട് വിസ്മയിപ്പിച്ചത്. മൂന്നു ദേശീയ അവാർഡും ഏഴു സംസ്ഥാന ചലച്ചിത്ര അവാർഡും നേടിയിട്ടുള്ള മമ്മൂട്ടി പതിമൂന്നു ഫിലിം ഫെയർ അവാർഡും ഒപ്പം പദ്മശ്രീയും നേടിയെടുത്തിട്ടുള്ള കലാകാരനാണ്.

മമ്മൂട്ടി പകരം വെക്കാനില്ലാത്ത അഭിനയ പ്രതിഭയാണെന്നും, അതുപോലെ അഭിനയത്തോട് അടങ്ങാത്ത ആർത്തിയുള്ള മനുഷ്യനാണെന്നും സോഷ്യൽ മീഡിയയിൽ ആരാധകർ കുറിക്കുന്നു. ഫാൻ മേഡ് മാഷപ്പ് വീഡിയോകൾ, കോമൺ ഡിപി, ഹാഷ് റ്റാഗുകൾ, മമ്മൂട്ടിയെ കുറിച്ച് പ്രശസ്ത വ്യക്തികൾ പങ്കു വെച്ച അഭിപ്രായങ്ങൾ എന്നിവയെല്ലാം പ്രചരിപ്പിച്ചു കൊണ്ടാണ് മമ്മൂട്ടി ആരാധകർ ഈ ദിവസം ആഘോഷിക്കുന്നത്. അഭിനയ ജീവിതത്തിന്റെ അൻപത്തിയൊന്നു വർഷങ്ങൾ പൂർത്തിയാക്കുമ്പോഴും മമ്മൂട്ടി തന്റെ തന്റെ പുതിയ ചിത്രവുമായി തിരക്കിലാണ്. ബി.ഉണ്ണികൃഷ്ണന്റെ സംവിധാനത്തില്‍ ഒരുങ്ങുന്ന ചിത്രത്തിന്റെ ഷൂട്ടിങ്ങിലാണ് അദ്ദേഹം. ഈ ത്രില്ലർ കൂടാതെ, ലിജോ ജോസ് പെല്ലിശ്ശേരി ചിത്രം നന്‍പകല്‍ നേരത്ത് മയക്കം, നിസാം ബഷീറിന്റെ റോഷാക്ക് എന്നിവയും അദ്ദേഹത്തിന്റേതായി ഇനി റിലീസ് ചെയ്യാനുണ്ട്.