ചോദ്യങ്ങളുടെ പ്രശ്നമായിട്ടാണോ ഉത്തരങ്ങളുടെ പ്രശ്നമായിട്ടാണോ മമ്മുക്കക്ക് തോന്നിയത്; വിവാദ അഭിമുഖത്തെ പറ്റി മാധ്യമ പ്രവർത്തകന്റെ ചോദ്യത്തിന് മമ്മൂട്ടിയുടെ മറുപടി

കഴിഞ്ഞ കുറച്ചു ദിവസങ്ങളിൽ സോഷ്യൽ മീഡിയയിൽ ഏറ്റവും കൂടുതൽ ചർച്ച ചെയ്യപ്പെട്ടത് നടൻ ശ്രീനാഥ് ഭാസിയുമായി ബന്ധപ്പെട്ട ഇന്റർവ്യൂ വിവാദമാണ്. സിനിമ പ്രമോഷന്റെ ഭാഗമായി നൽകിയ അഭിമുഖത്തിൽ, അവതാരകയുടെ ചോദ്യം ഇഷ്ട്ടപെടാതിരുന്ന ശ്രീനാഥ് ഭാസി അവരെ അസഭ്യം പറയുകയും അവസാനം അവർ കേസ് നൽകിയതോടെ ശ്രീനാഥ് ഭാസിയെ പോലീസ് അറസ്റ്റ് ചെയ്യുകയും ചെയ്തു. പിന്നീട് അവർ കേസ് പിൻവലിച്ചതോടെ ശ്രീനാഥ് ഭാസിയെ പോലീസ് വിട്ടയച്ചു. എന്നാൽ സിനിമാ താരങ്ങളോടും മറ്റും ഓൺലൈൻ മാധ്യമ പ്രവർത്തകർ ചോദിക്കുന്ന ചോദ്യങ്ങളെ കുറിച്ചും ചർച്ചകൾ ഉണ്ടായി. ഇപ്പോഴിതാ ഈ വിഷയത്തെ കുറിച്ച് മെഗാസ്റ്റാർ മമ്മൂട്ടി പറഞ്ഞ വാക്കുകളും ശ്രദ്ധ നേടുകയാണ്. വിവാദ ഇന്റർവ്യൂ വിഷയത്തിൽ, ആ സംഭവം നടന്നത് ചോദ്യങ്ങളുടെ പ്രശ്നമായിട്ടാണോ ഉത്തരങ്ങളുടെ പ്രശ്നമായിട്ടാണോ മമ്മുക്കക്ക് തോന്നിയത് എന്നായിരുന്നു മാധ്യമ പ്രവർത്തകന്റെ ചോദ്യം.

അതിന് മമ്മൂട്ടി പറയുന്നത്, ചോദ്യങ്ങളും ഉത്തരങ്ങളും സെൻസർ ചെയ്യാനാവില്ലെന്നും സാമാന്യമായിട്ടുള്ള ധാരണയാണ് വേണ്ടതെന്നുമാണ്. ദോഹയിൽ പുതിയ ചിത്രമായ റോഷാക്കിന്റെ പ്രചാരാണർത്ഥം നടന്ന വാർത്താസമ്മേളനത്തിലാണ് മമ്മൂട്ടി ഈ വിഷയത്തിൽ പ്രതികരിച്ചത്. നമ്മൾ തമ്മിലുള്ള ചോദ്യത്തിനും കുഴപ്പമില്ല ഉത്തരത്തിനും കുഴപ്പം വരാൻ വഴിയില്ല എന്നും, പക്ഷെ നമ്മൾ അതെ കുറിച്ച് ചർച്ച നടത്താൻ പോയാൽ ഒരുദിവസം പോരാതെ വരുമെന്നും മമ്മൂട്ടി പറയുന്നു. ഓരോരുത്തരും അവരവർ നേരിടുന്ന ചോദ്യങ്ങൾക്കുള്ള മറുപടിയാണ് പറയുന്നത് എന്ന് വിശദീകരിച്ച മമ്മൂട്ടി, അതിൽ കയറി നമ്മുക്ക് അഭിപ്രായം പറയാനോ നിയന്ത്രിക്കാനോ സാധിക്കില്ലെന്നും ആദ്യം ഉണ്ടാവേണ്ടത് സാമാന്യമായിട്ടുള്ള ധാരണയാണെന്നും കൂട്ടിച്ചേർത്തു. മമ്മൂട്ടിയുടെ പുതിയ ചിത്രമായ റോഷാക്ക് ഉടനെ പ്രദർശനത്തിനെത്തും.