തൊഴിൽ നിഷേധം തെറ്റ്; ശ്രീനാഥ് ഭാസിയെ വിലക്കാൻ പാടില്ലെന്ന് മമ്മൂട്ടി

ഈ അടുത്തിടെ മലയാള സിനിമയിൽ ചർച്ചയായി മാറിയ ഒന്നായിരുന്നു നടൻ ശ്രീനാഥ് ഭാസി ഉൾപ്പെട്ട ഇന്റർവ്യൂ വിവാദം. ചട്ടമ്പി എന്ന സിനിമയുടെ പ്രമോഷന്റെ ഭാഗമായി നടന്ന അഭിമുഖത്തിനിടയിൽ ഓൺലൈൻ മാധ്യമ പ്രവർത്തകയോട് അപമര്യാദയായി പെരുമാറി എന്ന കേസിൽ നടൻ ശ്രീനാഥ് ഭാസി അറസ്റ്റിലായിരുന്നു. അവതാരകയോടും അവിടെയുണ്ടായിരുന്ന ക്രൂ അംഗങ്ങളോടും മോശമായി പെരുമാറിയ നടനെതിരെ ആദ്യം പോലീസ് നടപടി എടുക്കുകയും, പിന്നീട് നടന്ന ഒത്തുതീർപ്പ് ചർച്ചകളുടെ ഭാഗമായി അവതാരക കേസ് പിൻവലിക്കുകയും ചെയ്തു. എന്നാൽ മോശമായ പെരുമാറ്റത്തിന്റെ പേരിൽ ഈ നടനെ സിനിമയിൽ നിന്ന് ഒരു നിശ്ചിത സമയത്തേക്ക് വിലക്കാനുള്ള നടപടിയാണ് മലയാളത്തിലെ സിനിമാ നിർമ്മാതാക്കളുടെ സംഘടന കൈക്കൊണ്ടത്.

ഇപ്പോൾ ആ തീരുമാനത്തിനെതിരെ മുന്നോട്ട് വന്നിരിക്കുകയാണ് മെഗാ സ്റ്റാർ മമ്മൂട്ടി. ആരെയും വിലക്കാൻ പാടില്ലെന്നും അതിനോട് യോജിപ്പില്ലെന്നും മമ്മൂട്ടി പ്രതികരിച്ചു. ആർക്കും തൊഴിൽ നിഷേധിക്കാൻ പാടില്ലെന്ന് പറഞ്ഞ മമ്മൂട്ടി, ആരുടെയും അന്നം ഇല്ലാതെയാക്കുന്നത് ശരിയല്ല എന്നും പറയുന്നു. മമ്മൂട്ടിയുടെ ഭീഷ്മ പർവം എന്ന ചിത്രത്തിൽ ശ്രീനാഥ് ഭാസി അഭിനയിച്ചിരുന്നു. അമൽ നീരദ് ഒരുക്കിയ ആ ചിത്രം ഈ വർഷമാണ് റിലീസ് ചെയ്തത്. തന്റെ ഏറ്റവും പുതിയ ചിത്രമായ റോഷാക്കിന്റെ പ്രൊമോഷന് വേണ്ടി നടത്തിയ പ്രസ് മീറ്റിലാണ് വിലക്ക് വിഷയത്തിൽ മമ്മൂട്ടി തന്റെ പ്രതികരണം നൽകിയത്. നിസാം ബഷീർ ഒരുക്കിയ റോഷാക്ക് നിർമ്മിച്ചതും മമ്മൂട്ടിയാണ്. ഒക്ടോബർ ഏഴിന് റിലീസ്‌ ചെയ്യാൻ പോകുന്ന ഈ ചിത്രം ഒരു സൈക്കോളജിക്കൽ ത്രില്ലറാണ്. സമീർ അബ്ദുൾ രചന നിർവ്വഹിച്ച ഈ ചിത്രം കേരളത്തിൽ ദുൽഖർ സൽമാൻ വിതരണം ചെയ്യും.