മെഗാസ്റ്റാറിന്റെ ത്രില്ലർ ചിത്രം പ്രഖ്യാപിച്ചു

മെഗാസ്റ്റാർ മമ്മൂട്ടി നായകനാവുന്ന പുതിയൊരു ചിത്രത്തിൻ്റെ പ്രഖ്യാപനം കഴിഞ്ഞ ദിവസം വന്നിരിക്കുകയാണ്. ഡിനോ ഡെന്നിസ് സംവിധാനം ചെയ്യാൻ പോകുന്ന ഈ ചിത്രം നിർമ്മിക്കുന്നത് തീയേറ്റർ ഓഫ് ഡ്രീംസ് എന്ന പുതിയ നിർമ്മാണ കമ്പനിയാണ്. പ്രശസ്ത നിർമ്മതാവും പ്രൊഡക്ഷൻ കൺട്രോളറു മായ ബാദുഷ തൻ്റെ ഫേസ്ബുക്ക് പേജിലൂടെ ഈ വിവരം പങ്കു വെക്കുകയായിരുന്നു. അദ്ദേഹത്തിൻ്റെ വാക്കുകൾ ഇപ്രകാരം,“നവാഗതനായ ഡീനോ ഡെന്നിസ് തിരക്കഥ എഴുതി സംവിധാനം ചെയ്യുന്ന ചിത്രത്തിൽ മെഗാസ്റ്റാർ മമ്മൂട്ടി നായകനാകുന്നു. ത്രില്ലർ ശ്രേണിയിലുള്ള ഈ ബിഗ്‌ ബഡ്ജറ്റ് ചിത്രം നിർമ്മിക്കുന്നത് തീയറ്റർ ഓഫ് ഡ്രീംസിന്റെ ബാനറിൽ ഡോൾവിൻ കുര്യാക്കോസും ജിനു വി എബ്രഹാമും ചേർന്നാണ്. നിമിഷ് രവിയാണ് ഛായാഗ്രഹണം, ബാദുഷ പ്രൊജക്ട് ഡിസൈനർ പൃഥ്വിരാജ് ചിത്രം കാപ്പ ടൊവിനൊ തോമസ് നായകനാകുന്ന അന്ന്വേഷിപ്പിൻ കണ്ടെത്തുo എന്നീ ചിത്രങ്ങൾക്കുശേഷഠ തീയറ്റർ ഓഫ് ഡ്രീംസ് നിർമ്മിക്കുന്ന ചിത്രം കൂടിയാണ് ഇത് പ്രശസ്ത തിരക്കഥാകൃത്ത് കലൂർ ഡെന്നീസിന്റെ മകനാണ് സംവിധായകൻ ഡിനൊ ഡെന്നീസ്”.

ആദം ജോൺ എന്ന ചിത്രം സംവിധാനം ചെയ്തിട്ടുള്ള ജിനു എബ്രഹാം, മാസ്റ്റേഴ്സ്, ലണ്ടൻ ഡ്രീംസ് തുടങ്ങി ഒരുപിടി ചിത്രങ്ങൾ രചിച്ചിട്ടുണ്ട്. പൃഥ്വിരാജ് നായകനായ കടുവ എന്ന ഷാജി കൈലാസ് ചിത്രം രചിച്ചതും ജിനു ഏബ്രഹാമാണ്. ജൂൺ മുപ്പതിനാണ് കടുവ റിലീസ് ചെയ്യുന്നത്. നിസാം ബഷീർ സംവിധാനം ചെയ്യുന്ന റോഷാക്ക് എന്ന സിനിമയിലാണ് ഇപ്പൊൾ മമ്മൂട്ടി അഭിനയിക്കുന്നത്. അതിനു ശേഷം ബി ഉണ്ണികൃഷ്ണൻ ഒരുക്കുന്ന ചിത്രമാകും അദ്ദേഹം ചെയ്യുക എന്നാണ് സൂചന. ഇത് കൂടാതെ പ്രശസ്ത ഛായാഗ്രാഹകൻ റോബി വർഗീസ് രാജ് ആദ്യമായി സംവിധാനം ചെയ്യാൻ പോകുന്ന ചിത്രത്തിലും മമ്മൂട്ടിയാണ് നായകനെന്നും വാർത്തകൾ വരുന്നുണ്ട്.