മായാവി ടീം ഒരിക്കൽ കൂടി എത്തുന്നുവെന്ന് വാർത്തകൾ..ആരാധകർ ആവേശത്തിൽ..!

മെഗാ സ്റ്റാർ മമ്മൂട്ടിയുടെ ആരാധകർ ഇപ്പോൾ ആവേശത്തിലാണ്. മറ്റൊന്നുമല്ല കാരണം, മമ്മുക്കയുടെ സൂപ്പർ ഹിറ്റ് ചിത്രമായ മായാവി ഒരുക്കിയ ടീം വീണ്ടുമൊരു മമ്മൂട്ടി ചിത്രവുമായി അടുത്ത വർഷമെത്തുന്നുണ്ടെന്നാണ് വാർത്തകൾ വരുന്നത്. ഔദ്യോഗിക സ്ഥിതീകരണം ഇത് വരെ മമ്മൂട്ടിയുടെ ഭാഗത്തു നിന്ന് ഉണ്ടായിട്ടില്ലെങ്കിലും ഈ ചിത്രം സംഭവിക്കുമെന്ന് തന്നെയാണ് മലയാള സിനിമ ഇൻഡസ്ട്രിയിൽ നിന്ന് ലഭിക്കുന്ന വിവരം. റാഫിയുടെ തിരക്കഥയിൽ ഷാഫി സംവിധാനം ചെയ്യാൻ പോകുന്ന ഈ കോമഡി എന്റെർറ്റൈനെർ നിർമ്മിക്കുന്നത് വൈശാഖ ഫിലിമ്സിൻറെ ബാനറിൽ വൈശാഖ് രാജൻ ആയിരിക്കും. അടുത്ത വർഷമാണ് ചിത്രത്തിന്റെ ചിത്രീകരണം തുടങ്ങാൻ സാധ്യതയുള്ളൂ എന്നാണ് റിപ്പോർട്ടുകൾ പറയുന്നത്.

ഷാഫി- മമ്മൂട്ടി ചിത്രമായ മായാവി പുറത്തിറങ്ങിയത് 2007 ലാണ് . റാഫി-മെക്കാർട്ടിൻ ടീം തിരക്കഥയൊരുക്കിയ മായാവി ആ വർഷത്തെ വമ്പൻ ബോക്സ് ഓഫീസ് വിജയങ്ങളിലൊന്നായിരുന്നു.

മമ്മൂട്ടിയുടെ ടൈറ്റിൽ കഥാപാത്രമായ മഹി അഥവാ മായാവി അദ്ദേഹത്തിന്റെ കരിയറിലെ തന്നെ ഏറ്റവും ജനപ്രിയമായ കഥാപാത്രങ്ങളിൽ ഒന്നാണ്. ഷാഫി മമ്മൂട്ടിയെ വെച്ച് ആദ്യമായി ഒരുക്കിയ തൊമ്മനും മക്കളും എന്ന ചിത്രവും വലിയ വിജയമായിരുന്നു. അതിനു ശേഷം ആണ് മായാവി, ചട്ടമ്പിനാട്, വെനീസിലെ വ്യാപാരി എന്നീ ചിത്രങ്ങൾ ഷാഫി- മമ്മൂട്ടി ടീമിൽ നിന്ന് നമ്മുക്ക് ലഭിച്ചത്. ഇവയും വൻ വിജയം ആയിരുന്നു

ഷാഫി ഇപ്പോൾ ബിജു മേനോനെ നായകനാക്കി ഒരുക്കുന്ന ഷെർലോക് ടോംസ് എന്ന ചിത്രത്തിന്റെ പണിപ്പുരയിലാണ്. വരുന്ന ഒക്ടോബറിൽ ഈ ചിത്രം പ്രദർശനത്തിനെത്തുമെന്നാണ്‌ സൂചനകൾ ലഭിക്കുന്നത്.

ഷാഫിയും റാഫിയും അവസാനമായി ഒന്നിച്ചത് ദിലീപ് നായകനായ ടൂ കൺട്രിസ് എന്ന ചിത്രത്തിലാണ്. 2015 ഇൽ പുറത്തിറങ്ങിയ ഈ ചിത്രം 50 കോടി ക്ലബ്ബിൽ ഇടം നേടിയ മലയാള ചിത്രങ്ങളിലൊന്നാണ്.

റാഫി ഈ വർഷം ഫഹദ് ഫാസിലിനെ വെച് റോൾ മോഡൽസ് എന്ന ചിത്രം സംവിധാനം ചെയ്തിരുന്നു. അതുപോലെ ദിലീപ് നായകനായി വരുന്ന പ്രൊഫസർ ഡിങ്കൻ എന്ന ചിത്രത്തിന്റെയും തിരക്കഥാകൃത്തു റാഫി ആണ്.