മമ്മൂട്ടിയും ഡെന്നിസ് ജോസഫും വീണ്ടും; മാസ്സ് ചിത്രമൊരുക്കാൻ ഒമർ ലുലു

ഹാപ്പി വെഡിങ്, ചങ്ക്സ്, ഒരു അഡാർ ലൗ, ധമാക്ക എന്നീ ചിത്രങ്ങളൊരുക്കി പ്രശസ്തനായ സംവിധായകൻ ഒമർ ലുലു മെഗാ സ്റ്റാർ മമ്മൂട്ടിക്കൊപ്പം ഒന്നിക്കുന്നു. ഒമർ ലുലു തന്നെയാണ് ഈ വിവരം തന്റെ ഫേസ്ബുക്ക് പേജിൽ നൽകിയ ഒരു കമന്റിലൂടെ പുറത്തു വിട്ടത്. ഒരു മാസ്സ് സിനിമ വേണ്ടേ എന്നുള്ള ആരാധകന്റെ ചോദ്യത്തിന് ഒമർ ലുലു കൊടുക്കുന്ന മറുപടി ഇങ്ങനെ, മമ്മൂക്കാക്ക് വേണ്ടി പക്കാ ഒരു മാസ്സ് സിനിമ ഡെന്നിസ് ജോസഫ് സാറും ഞാനും കൂടി പ്ലാന്‍ ചെയ്യുന്നുണ്ട്. ഞാന്‍ എന്നും ഈ തമാശ കളിച്ചു നടന്നാല്‍ ശരിയാവില്ല ഇടയ്ക്കു ഒരു മാസ്സൊക്കെ വേണ്ടേ. എന്നാൽ ഇതിന് രചന നിർവഹിക്കുന്നത് ഡെന്നിസ് ജോസഫ് ആയിരിക്കുമെന്നുള്ള സൂചനയാണ് മമ്മൂട്ടി ആരാധകരെ ഏറെ ആവേശം കൊള്ളിക്കുന്നത്.

ഒട്ടേറെ സൂപ്പർ ഹിറ്റുകൾ മമ്മൂട്ടി, മോഹൻലാൽ എന്നിവർക്ക് സമ്മാനിച്ചിട്ടുള്ള ഡെന്നിസ് ജോസഫ് ആണ് 1987 ൽ താരമെന്ന നിലയിൽ മമ്മൂട്ടിക്ക് വലിയ തിരിച്ചു വരവ് സമ്മാനിച്ച ജോഷി ചിത്രം ന്യൂ ഡൽഹിയും രചിച്ചത്. രാജാവിന്റെ മകന്‍, കോട്ടയം കുഞ്ഞച്ചന്‍, സംഘം, നായര്‍ സാബ്, ഗാന്ധർവം, വഴിയൊരക്കാഴ്ചകൾ, ഇന്ദ്രജാലം, ആകാശദൂത്, നമ്പര്‍ 20 മദ്രാസ് മെയില്‍, ഭൂമിയിലെ രാജാക്കന്മാർ, നിറക്കൂട്ടു, ശ്യാമ എന്നീ സൂപ്പര്‍ഹിറ്റ് എന്നീ ചിത്രങ്ങൾ രചിച്ചത് ഡെന്നിസ് ജോസഫാണ്. അഥര്‍വം, മനു അങ്കിള്‍, അപ്പു, അഗ്രജന്‍ എന്നീ സിനിമകള്‍ സംവിധാനവും ചെയ്തിട്ടുണ്ട് അദ്ദേഹം. മമ്മൂട്ടി- ജോഷി- ഡെന്നിസ് ജോസഫ് ടീമും അതുപോലെ മോഹൻലാൽ- തമ്പി കണ്ണന്താനം- ഡെന്നിസ് ജോസഫ് ടീമും വമ്പൻ ഹിറ്റുകളാണ് മലയാള സിനിമക്ക് നൽകിയിരിക്കുന്നത്.