മമ്മൂട്ടിയുടെ ക്രിസ്റ്റഫർ ഉദയകൃഷ്ണയുടെ ഗംഭീര കഥ; വെളിപ്പെടുത്തി മാമാങ്കം നിർമ്മാതാവ്

മെഗാസ്റ്റാർ മമ്മൂട്ടിയെ നായകനാക്കി ബി ഉണ്ണികൃഷ്ണൻ സംവിധാനം ചെയ്ത ചിത്രമാണ് ക്രിസ്റ്റഫർ. ഇപ്പോൾ പോസ്റ്റ് പ്രൊഡക്ഷൻ സ്റ്റേജിലുള്ള ഈ ചിത്രം അടുത്ത മാസം അവസാനത്തോടെ റിലീസ് ചെയ്യുമെന്നാണ് സൂചന. ഉദയ കൃഷ്ണ തിരക്കഥ രചിച്ച ഈ ചിത്രം നിർമ്മിച്ചിരിക്കുന്നതും സംവിധായകൻ ബി ഉണ്ണികൃഷ്ണൻ തന്നെയാണ്. ഒരു ഇൻവെസ്റ്റിഗേഷൻ ത്രില്ലറായി ഒരുക്കിയിരിക്കുന്ന ഈ ചിത്രത്തിൽ പോലീസ് ഓഫീസറായി ആണ് മമ്മൂട്ടി അഭിനയിച്ചിരിക്കുന്നത്. ഇപ്പോഴിതാ, ഈ ചിത്രം ഗംഭീരമാകുമെന്ന് വെളിപ്പെടുത്തി മുന്നോട്ട് വന്നിരിക്കുകയാണ് പ്രശസ്ത നിർമ്മാതാവ് വേണു കുന്നപ്പിള്ളി. കാവ്യാ ഫിലിംസിന്റെ ബാനറിൽ മമ്മൂട്ടി നായകനായ മാമാങ്കം എന്ന ബിഗ് ബഡ്ജറ്റ് ചിത്രം ഒരുക്കി മലയാളത്തിലെത്തിയ നിർമ്മാതാവാണ് അദ്ദേഹം. ഇനി റിലീസ് ചെയ്യാൻ പോകുന്ന ബിഗ് ബഡ്ജറ്റ് ചിത്രങ്ങളായ ജൂഡ് ആന്റണി ഒരുക്കിയ 2018, ഉണ്ണി മുകുന്ദൻ നായകനായ മാളികപ്പുറം എന്നീ ചിത്രങ്ങളുടെയും നിർമ്മാതാവ് ആണ് വേണു കുന്നപ്പിള്ളി. ഈ ചിത്രങ്ങളുടെ ട്രൈലെർ ലോഞ്ചിനിടെയാണ് അദ്ദേഹം ക്രിസ്റ്റഫറിനെ കുറിച്ച് പറഞ്ഞത്.

ഈ ചിത്രത്തിന്റെ കഥ താൻ കേട്ടതാണെന്നും അതൊരു ഗംഭീര കഥയാണെന്നും അദ്ദേഹം പറയുന്നു. മമ്മൂട്ടിയെ തന്നെ നായകനാക്കി അത് നിർമ്മിക്കണമെന്ന് ആഗ്രഹിച്ചെങ്കിലും അത് സാധിച്ചില്ലെന്നും അദ്ദേഹം വെളിപ്പെടുത്തി. ബി. ഉണ്ണികൃഷ്ണൻ സംവിധാനം ചെയ്ത ക്രിസ്റ്റഫർ ഒരു ഗംഭീര സിനിമയാവുമെന്ന് തനിക്ക് ഉറപ്പാണെന്നും വേണു കുന്നപ്പിള്ളി പറഞ്ഞു. ഐശ്വര്യ ലക്ഷ്മി, അമല പോൾ, ഷൈൻ ടോം ചാക്കോ, സ്നേഹ, വിക്രം ഫെയിം വാസന്തി, ദിലീഷ് പോത്തൻ, സിദ്ദിഖ്, ജിനു ജോസഫ് എന്നിവരും വേഷമിട്ട ഈ ചിത്രത്തിന് സംഗീതമൊരുക്കുന്നത് ജസ്റ്റിൻ വർഗീസ്, എഡിറ്റ് ചെയ്യുന്നത് മനോജ്, ക്യാമറ ചലിപ്പിച്ചത് ഫെയ്‌സ് സിദ്ദിഖി എന്നിവരാണ്.