ആരാധകർക്കായി കിടിലൻ ചിത്രവുമായി സൂപ്പർ താരങ്ങൾ;സ്റ്റൈലൻ ലുക്കിൽ മോഹൻലാലും മമ്മൂട്ടിയും…

ആരാധകർക്കും മലയാള സിനിമ പ്രേക്ഷകർക്കും ഒത്തിരി സന്തോഷം നൽകുന്ന ചിത്രങ്ങളാണ് അമ്മ സ്റ്റേജ് ഷോയുടെ ഭാഗമായി പുറത്ത് വന്നുകൊണ്ടിരിക്കുന്നത്. മഴവിൽ മനോരമയുടെയൊപ്പം മലയാളത്തിലെ ഏറ്റവും വലിയ താരസംഘടനയായ അമ്മ നടത്തുന്ന സ്റ്റേജ് ഷോ അമ്മ മഴവിൽ, താരങ്ങളുടെ പ്രകടനത്തോടൊപ്പം ഇതിനോടകം തന്നെ കൗതുകമുണർത്തുന്ന ഒന്നായി മാറിക്കഴിഞ്ഞു. സൂപ്പർ താരങ്ങളും നടീനടന്മാരും യുവതാരങ്ങളും ഹാസ്യതാരങ്ങളും തുടങ്ങി മലയാളത്തിലെ ഏതാണ്ട് ഒട്ടു മിക്ക മുൻനിര താരങ്ങളും പരിപാടിയിൽ അണിനിരക്കുന്നുണ്ട്. ഓരോ ദിവസവും പരിപാടിയുടെതായി പുറത്തുവന്നുകൊണ്ടിരിക്കുന്ന പുതിയ ചിത്രങ്ങൾ ആരാധകർക്ക് ആവേശമായി മാറുകയാണ് അതിനിടെയാണ് സോഷ്യൽ മീഡിയയിൽ തരംഗമാകാൻ പുതിയ ചിത്രം കൂടി എത്തിയിരിക്കുന്നത്.

മലയാളികളുടെ അഭിമാനമായ രണ്ട് താരങ്ങൾ മെഗാസ്റ്റാർ മമ്മൂട്ടിയും കംപ്ലീറ്റ് ആക്ടർ മോഹൻലാലും ഒരേ ഫ്രെയിമിൽ വന്ന പുതിയ ചിത്രമാണ് ഇന്ന് പുറത്ത് വന്നിരിക്കുന്നത്. മോഹൻലാലിന്റെയും മമ്മൂട്ടിയുടെയും നൃത്ത പരിശീലന വീഡിയോ കുറച്ചു ദിവസങ്ങൾക്ക് മുൻപ് പുറത്ത് വന്നിരുന്നു. അതിന് ശേഷം ഇരുവരുമൊത്തുള്ള യുവതാരങ്ങളുടെ ചിത്രങ്ങളും സോഷ്യൽ മീഡിയയിൽ നിറഞ്ഞു. അപ്പോഴും ഇരുവരും ഒന്നിച്ചുള്ള ചിത്രം മാത്രം വന്നിരുന്നില്ല എങ്കിലും ഇരുവരുടെയും ആരാധകരുടെ കാത്തിരിപ്പുകൾക്കൊടുവിൽ സമ്മാനമായി ഇരുവരും ഒന്നിച്ചുള്ള ചിത്രം എത്തി. ചിത്രത്തിൽ മമ്മൂട്ടിയും മോഹൻലാലും കൂടാതെ ജയറാമും മകൻ കാളിദാസനും ഒപ്പമുണ്ട്. സ്റ്റൈലിൽ ലുക്കിലാണ് മമ്മൂട്ടിയും മോഹൻലാലും ചിത്രത്തിലുള്ളത്. ചിത്രം സ്റ്റേജ് ഷോയ്ക്കായി കാത്തിരിക്കുന്ന പ്രേക്ഷകരുടെ ആവേശം ഇരട്ടിപ്പിക്കുമെന്ന് ഉറപ്പാണ്. സൂപ്പർ താരങ്ങൾ മണ്ണിൽ അവതരിക്കുന്ന അമ്മ മഴവിൽ ഷോ അനന്തപുരിയെ ഞെട്ടിക്കാൻ മെയ് ആറിന് അരങ്ങേറും.