സൂപ്പർ സ്റ്റാറിന്റെ കബാലി പോലെ മെഗാ സ്റ്റാറിന്റെ മാമാങ്കവും..!!

സൂപ്പർ സ്റ്റാർ രജനികാന്തിന്റെ കബാലി എന്ന ചിത്രം മൂന്നു വർഷം മുൻപ് റിലീസ് ചെയ്തപ്പോൾ തമിഴ്‌നാട്ടിൽ ഈ ചിത്രം കാണാൻ അവിടുത്തെ കമ്പനികള്‍ ജീവനക്കാര്‍ക്ക് അവധി കൊടുത്തത് വലിയ വാർത്ത ആയിരുന്നു. ഇപ്പോൾ മലയാളത്തിന്റെ മെഗാ സ്റ്റാർ മമ്മൂട്ടിയുടെ കരിയറിലെ ഏറ്റവും വലിയ ചിത്രമായ മാമാങ്കം റിലീസിന് തയ്യാറെടുക്കുമ്പോൾ ഇവിടെ കമ്പനികള്‍ തങ്ങളുടെ ജീവനക്കാര്‍ക്ക് വേണ്ടി സ്പെഷ്യല്‍ ഷോസ് ബുക്ക് ചെയ്യുകയാണ് എന്ന റിപ്പോർട്ടുകൾ ആണ് പുറത്തു വരുന്നത്. ഈ വാർത്ത മമ്മൂട്ടി ആരാധകരെ ഏറെ ആവേശം കൊള്ളിക്കുകയാണ് ഇപ്പോൾ. ഈ മാസം നവംബർ ഇരുപത്തിയൊന്നിനാണ് മാമാങ്കം വേൾഡ് വൈഡ് റിലീസ് ആയി എത്തുക.

ബാങ്കുകളും ജ്വല്ലറി, ടെക്‌സ്‌റ്റൈല്‍ സ്ഥാപനങ്ങളും തങ്ങളുടെ കസ്റ്റമേഴ്‌സിനു വേണ്ടി സ്‌ക്രീനുകള്‍ ബുക്ക് ചെയ്യുകയാണ് എന്നും ഐടി കമ്പനികള്‍ തങ്ങളുടെ ജീവനക്കാര്‍ക്ക് വേണ്ടി സ്‌ക്രീനുകള്‍ ബുക്ക് ചെയ്യാന്‍ സിനിമയുടെ പ്രൊഡക്ഷന്‍ കമ്പനിയെ സമീപിക്കുകയാണ് എന്നുമാണ് വാർത്തകൾ വരുന്നത്. അമ്പതു കോടി രൂപ മുതൽ മുടക്കിൽ കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി നിർമ്മിച്ച ഈ ചിത്രം സംവിധാനം ചെയ്തിരിക്കുന്നത് എം പദ്മകുമാർ ആണ്. ശങ്കർ രാമകൃഷ്ണൻ അവലംബിത തിരക്കഥ രചിച്ച ഈ ചിത്രത്തിൽ വലിയ താര നിര തന്നെ അണിനിരക്കുന്നുണ്ട്.

ഉണ്ണി മുകുന്ദൻ, സുദേവ് നായർ, മണികണ്ഠൻ ആചാരി, മാസ്റ്റർ അച്യുതൻ, പ്രാചി ടെഹ്‌ലൻ, കനിഹ, ഇനിയ, അനു സിതാര, ഇടവേള ബാബു, ജയൻ ചേർത്തല, സുനിൽ സുഗത, സുരേഷ് കൃഷ്ണ, മണിക്കുട്ടൻ തുടങ്ങി ഒട്ടേറെ അഭിനേതാക്കൾ ഉള്ള ഈ ചിത്രത്തിന്റെ ടീസർ, ട്രൈലെർ, മേക്കിങ് വീഡിയോ എന്നിവ മികച്ച പ്രേക്ഷക ശ്രദ്ധ നേടിയിരുന്നു. അതോടൊപ്പം തന്നെ എം ജയൻചന്ദ്രൻ ഈണമിട്ട മൂക്കുത്തി സോങ് വീഡിയോയും പ്രേക്ഷക ശ്രദ്ധ നേടിയെടുത്തിട്ടുണ്ട്. മനോജ് പിള്ള ദൃശ്യങ്ങൾ ഒരുക്കിയ ഈ ചിത്രം പറയുന്നത് മാമാങ്ക ചരിത്രവും ചാവേറുകളുടെ കഥയുമാണ്. രാജ മുഹമ്മദ് എഡിറ്റ് ചെയ്യുന്ന മാമാങ്കത്തിന് പശ്ചാത്തല സംഗീതം ഒരുക്കുന്നത് ബോളിവുഡ് ടീം ആയ അങ്കിത്- സഞ്ചിത് സഹോദരന്മാർ ആണ്.