മാമാങ്കം ടീസർ ഉടനെ; പോസ്റ്റ്-പ്രൊഡക്ഷൻ വിവരങ്ങൾ പങ്കു വെച്ചു നിർമ്മാതാവ്..!

മെഗാ സ്റ്റാർ മമ്മൂട്ടി നായകനായി എത്തുന്ന മാമാങ്കം എന്ന ബിഗ് ബജറ്റ് ചിത്രം ഈ വർഷം ഒക്ടോബറിൽ റിലീസിന് എത്തും എന്നാണ് ഇതുവരെയുള്ള റിപ്പോർട്ടുകൾ പറയുന്നത്. സജീവ് പിള്ളൈ തുടങ്ങി വെച്ച ഈ ചിത്രം പിന്നീട് പൂർത്തിയാക്കിയത് പ്രശസ്ത സംവിധായകൻ ആയ എം പദ്മകുമാർ ആണ്. കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി ആണ് ഈ ചിത്രം നിർമ്മിക്കുന്നത്. ഈ ചിത്രത്തിന്റെ ടീസർ ഉടൻ എത്തും എന്നാണ് ഇപ്പോൾ ലഭിക്കുന്ന വിവരങ്ങൾ സൂചിപ്പിക്കുന്നത്. ഇപ്പോൾ പോസ്റ്റ്-പ്രൊഡക്ഷൻ സ്റ്റേജിൽ ഉള്ള ചിത്രത്തിന്റെ പുതിയ വിവരങ്ങൾ നിർമ്മാതാവ് വേണു കുന്നപ്പിള്ളി പുറത്തു വിട്ടു. ഇപ്പോൾ ചിത്രത്തിന്റെ ഡി ഐ ജോലികൾ ആണ് നടക്കുന്നത് എന്നും ടീസർ ഉടൻ പ്രതീക്ഷിക്കാം എന്നും അദ്ദേഹം പറയുന്നു.

മമ്മൂട്ടിയുടെ ജന്മദിനമായ സെപ്റ്റംബർ ഏഴിന് മാമാങ്കം ടീസർ എത്തും എന്നാണ് ഏവരും പ്രതീക്ഷിക്കുന്നത്. പ്രശസ്ത ഡി ഐ കളർ ഗ്രെഡിങ് വിദഗ്ദ്ധൻ ആയ കെൻ മേറ്റ്‌സ്‌കേർ ആണ് മാമാങ്കത്തിന്റെ ഡി ഐ ജോലികൾ ചെയ്യുന്നത് എന്ന വിവരവും വേണു കുന്നപ്പിള്ളി പങ്കു വെച്ചു. ചിത്രത്തിന്റെ ആദ്യ സംവിധായകൻ സജീവ് പിള്ളയെ ഒഴിവാക്കിയതുമായി ബന്ധപ്പെട്ട വിവാദങ്ങൾ ഈ ചിത്രത്തെ സോഷ്യൽ മീഡിയയുടെ ചർച്ചാ വിഷയമാക്കി മാറ്റിയിരുന്നു. മമ്മൂട്ടിക്കൊപ്പം ഉണ്ണി മുകുന്ദൻ, അനു സിതാര, സുദേവ് നായർ തുടങ്ങിയവരും ബോളിവുഡ് നടി പ്രാചി ടെഹ്‌ലനും ഈ ചിത്രത്തിൽ അഭിനയിക്കുന്നുണ്ട്. ശാം കൗശൽ, ത്യാഗരാജൻ മാസ്റ്റർ എന്നിവർ ഒരുക്കിയ വമ്പൻ ആക്ഷൻ രംഗങ്ങൾ ഈ ചിത്രത്തിന്റെ ഹൈലൈറ്റ് ആയിരിക്കും എന്നാണ് റിപ്പോർട്ടുകൾ പറയുന്നത്.