മാമാങ്കം നായിക ഇനി മോഹൻലാലിനൊപ്പം; റാം ലൊക്കേഷനിൽ പ്രാചി ടെഹ്‌ലാൻ

മെഗാ സ്റ്റാർ മമ്മൂട്ടി നായകനായ മാമാങ്കം എന്ന ബിഗ് ബജറ്റ് ചിത്രത്തിലൂടെ മലയാള സിനിമയിൽ അരങ്ങേറ്റം കുറിച്ച നടി ആണ് പ്രാചി ടെഹ്‌ലൻ. ആ ചിത്രത്തിൽ ഈ ബോളിവുഡ് നടി മികച്ച പ്രകടനം ആണ് കാഴ്ച വെച്ചത്. സൗന്ദര്യം കൊണ്ടും അഭിനയ മികവ് കൊണ്ടും പ്രേക്ഷകരുടെ പ്രശംസ നേടിയെടുക്കാൻ ഈ നടിക്ക് സാധിച്ചിട്ടുണ്ട്. ഇപ്പോഴിതാ മലയാളത്തിൽ വീണ്ടുമൊരു ചിത്രത്തിൽ പ്രത്യക്ഷപ്പെടാൻ ഉള്ള ഒരുക്കത്തിൽ ആണ് പ്രാചി. മലയാളത്തിലെ മറ്റൊരു സൂപ്പർ താരം ആയ കംപ്ലീറ്റ് ആക്ടർ മോഹൻലാൽ നായകനാവുന്ന റാം എന്ന ചിത്രത്തിൽ അഭിനയിക്കാൻ ഉള്ള ക്ഷണം ലഭിച്ചിട്ടുണ്ട് എന്നും തിരക്കഥ വായിച്ചു നോക്കിയിട്ടു അവസാന തീരുമാനം എടുക്കും എന്നും പ്രാചി ടെഹ്‌ലൻ പറയുന്നു.

കഴിഞ്ഞ ദിവസം റാം ചിത്രത്തിന്റെ ലൊക്കേഷനിൽ പോയി മോഹൻലാൽ, ഈ ചിത്രത്തിന്റെ സംവിധായകൻ ജീത്തു ജോസഫ് എന്നിവരെ കണ്ടിരുന്നു പ്രാചി. മോഹൻലാലിനൊപ്പമുള്ള ചിത്രം പങ്കു വെച്ച് കൊണ്ട് പ്രാചി പറഞ്ഞ വാക്കുകൾ ഇപ്പോൾ സോഷ്യൽ മീഡിയയിൽ വൈറൽ ആണ്. തന്റെ ജീവിതാവസാനം വരെ താൻ മറക്കാത്ത നിമിഷങ്ങളിൽ ഒന്നായിരിക്കും മോഹൻലാൽ എന്ന ഈ ഇതിഹാസത്തെ ആദ്യമായി കണ്ട നിമിഷം എന്നാണ് പ്രാചി പറയുന്നത്. അദ്ദേഹവുമൊത്തു ഒരുപാട് സമയം ചിലവിടാൻ സാധിച്ചില്ലെങ്കിലും മാമാങ്കം കണ്ടതിനു ശേഷം അദ്ദേഹമാണ് റാം എന്ന ചിത്രത്തിലെ ഒരു വേഷം ചെയ്യാൻ തന്നെ നിർദേശിച്ചത് എന്ന് പറഞ്ഞപ്പോൾ വളരെ സന്തോഷം തോന്നി എന്നും പ്രാചി പറയുന്നു. തൃഷ ആണ് റാമിലെ നായികാ വേഷം ചെയ്യുന്നത്. ഇതിലെ മോഹൻലാലിന്റെ ലുക്ക് ഇപ്പോഴേ സോഷ്യൽ മീഡിയയിൽ വലിയ ശ്രദ്ധ നേടുന്നുണ്ട്.