മലയാളത്തിലെ ഏറ്റവും വലിയ റിലീസ് ആവാൻ മാമാങ്കം വരുന്നു

മെഗാ സ്റ്റാർ മമ്മൂട്ടിയുടെ കരിയറിലെ ഏറ്റവും വലിയ ചിത്രമായ മാമാങ്കം അടുത്ത മാസം പന്ത്രണ്ടിന് റിലീസ് ചെയ്യാൻ പോവുകയാണ്. എം പദ്മകുമാർ സംവിധാനം ചെയ്ത ഈ ചിത്രം മലയാളത്തിലെ ഇതുവരെയുള്ള ഏറ്റവും വലിയ റിലീസ് ആയാവും എത്തുക എന്നാണ് സൂചന. കേരളത്തിൽ മാത്രം നാനൂറോളം സ്‌ക്രീനുകളിൽ എത്തുന്ന ഈ ചിത്രം നാലു ഭാഷകളിൽ ആണ് ഒരേ ദിവസം റിലീസ് ചെയ്യുന്നത്. മലയാളം കൂടാതെ, തമിഴ്, ഹിന്ദി, തെലുങ്കു ഭാഷകളിൽ ആയാണ് ഈ ചിത്രം ഡബ്ബ് ചെയ്തിരിക്കുന്നത്. കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി നിർമ്മിച്ചിരിക്കുന്ന ഈ ചിത്രത്തിൽ മമ്മൂട്ടിക്ക് ഒപ്പം ഉണ്ണി മുകുന്ദൻ, മാസ്റ്റർ അച്യുതൻ എന്നിവർ ചാവേറുകളായി എത്തുന്നു.

ബോളിവുഡ് നടി പ്രാചി ടെഹ്‌ലൻ, മലയാള താരങ്ങളായ അനു സിതാര, കനിഹ, ഇനിയ തുടങ്ങിയവർ ആണ് ഈ ചിത്രത്തിലെ പ്രധാന സ്ത്രീ കഥാപാത്രങ്ങൾക്ക് ജീവൻ നൽകുന്നത്. ശങ്കർ രാമകൃഷ്ണൻ അവലംബിത തിരക്കഥ രചിച്ച ഈ ചിത്രം ഒരു ഇമോഷണൽ ത്രില്ലർ ആണെന്ന് സംവിധായകൻ പറയുന്നു. ബോളിവുഡിൽ നിന്നുള്ള ശാം കൗശൽ സംഘട്ടനം ഒരുക്കിയ ഈ ചിത്രം എഡിറ്റ് ചെയ്യുന്നത് രാജ മുഹമ്മദും ഇതിനു വേണ്ടി ക്യാമറ ചലിപ്പിച്ചിരിക്കുന്നതു മനോജ് പിള്ളയും ആണ്. സുദേവ് നായർ, മണിക്കുട്ടൻ, മണികണ്ഠൻ ആചാരി, ഇടവേള ബാബു, കവിയൂർ പൊന്നമ്മ, ജയൻ ചേർത്തല, സുരേഷ് കൃഷ്ണ തുടങ്ങിയവരും ഈ ചിത്രത്തിൽ അഭിനയിക്കുന്നുണ്ട്.

ബോളിവുഡ് ടീം ആയ സഞ്ചിത് ബൽഹാരയും അങ്കിത് ബൽഹാരയും ചേർന്നാണ് മാമാങ്കത്തിന് പശ്ചാത്തല സംഗീതം ഒരുക്കിയിരിക്കുന്നത്. എസ് ബി സതീശൻ ഒരുക്കിയിരിക്കുന്ന വസ്ത്രാലങ്കാരവും അതുപോലെ പി എം സതീഷ്, മനോജ്, എം ഗോസ്വാമി എന്നിവരുടെ പ്രൊഡക്ഷൻ ഡിസൈനും ഈ ചിത്രത്തെ കൂടുതൽ മനോഹരമാക്കിയിട്ടുണ്ട് എന്നത് സോങ് വീഡിയോ, മേക്കിങ് വീഡിയോ എന്നിവയിൽ നിന്നൊക്കെ വ്യക്തമാണ്. എം ജയചന്ദ്രൻ ആണ് ഈ ചിത്രത്തിന് വേണ്ടി ഗാനങ്ങൾ ഒരുക്കിയത്.