“അലമാരയിൽ വെച്ചു പൂട്ടിയേക്കുവാ മോനേ, ആവശ്യത്തിന് പുറത്തെടുത്താൽ മതിയല്ലോ?” ആരാധകൻറെ ചോദ്യത്തിന് കിടിലൻ മറുപടിയുമായി മല്ലിക സുകുമാരൻ

പ്രശസ്ത മലയാള നടിയും യുവ സൂപ്പർ താരം പൃഥ്വിരാജ് സുകുമാരന്റെ അമ്മയുമായ മല്ലിക സുകുമാരൻ കഴിഞ്ഞ ദിവസം ഫേസ്ബുക് ലൈവിൽ വന്നപ്പോൾ ഒട്ടേറെ ചോദ്യങ്ങളുമായി ആരാധകർ അവിടെ എത്തിയിരുന്നു. കൂടുതൽ പേരും മല്ലികയുടെ മക്കളും നടന്മാരുമായ പൃഥ്വിരാജ് സുകുമാരൻ, ഇന്ദ്രജിത് സുകുമാരൻ എന്നിവരെ കുറിച്ചാണ് ചോദിച്ചത്. എന്നാൽ അതിൽ ചിലർ രസകരമായ ചില ചോദ്യങ്ങൾ ചോദിക്കുകയും അതിനു കിടിലൻ മറുപടി നൽകി മല്ലിക സുകുമാരൻ കയ്യടി നേടുകയും ചെയ്തു. സോഷ്യൽ മീഡിയയിൽ വളരെയധികം സജീവമായ മല്ലിക സുകുമാരൻ മകൻ പൃഥ്വിരാജ് സുകുമാരനും ഇന്ദ്രജിത് സുകുമാരനും അതുപോലെ ഇന്ദ്രജിത്തിന്റെ ഭാര്യയും നടിയുമായ പൂർണ്ണിമക്കും സോഷ്യൽ മീഡിയയിലൂടെ നൽകിയ ചില മറുപടികൾ വളരെ വലിയ രീതിയിൽ തന്നെ വൈറലായിരുന്നു. അതുപോലെ കഴിഞ്ഞ ദിവസത്തെ മല്ലിക സുകുമാരന്റെ ഒരു മറുപടിയും ശ്രദ്ധ നേടുകയാണ്.

ഇന്ത്യൻ എക്സ്പ്രസ്സിന്റെ ഫേസ്ബുക് ലൈവിൽ അതിഥിയായി കഴിഞ്ഞ ദിവസം വന്നപ്പോൾ ഒരു ആരാധകൻ മല്ലിക സുകുമാരനോട് ചോദിച്ചത് “ലംബോർഗിനി എവിടെ അമ്മേ?” എന്നായിരുന്നു. ആ ചോദ്യത്തിന് മല്ലിക സുകുമാരൻ നൽകിയ മറുപടി ഇങ്ങനെ, ““അലമാരയിൽ വെച്ചു പൂട്ടിയേക്കുവാ മോനേ, ആവശ്യത്തിന് പുറത്തെടുത്താൽ മതിയല്ലോ?”. ഏതായാലും താരത്തിന്റെ ആ മറുപടിക്കു വലിയ കയ്യടിയാണ് സോഷ്യൽ മീഡിയയിൽ നിന്ന് ലഭിക്കുന്നത്. പൃഥ്വിരാജ് പുതിയ ലംബോർഗിനി മേടിച്ചപ്പോൾ മല്ലിക സുകുമാരൻ അതിനെ കുറിച്ച് പറയുന്ന ഒരു വീഡിയോ സോഷ്യൽ മീഡിയയിൽ ഏറെ ട്രോള് ചെയ്യപ്പെട്ടിരുന്നു. ഏതായാലും ഇപ്പോൾ ട്രോളന്മാരെ തിരിച്ചു ട്രോളുന്ന മല്ലിക സുകുമാരൻ എന്ന അമ്മയും നടിയും ട്രോളന്മാരുടെയും ഫേവറിറ്റ് ആയി മാറി കഴിഞ്ഞു.