അവൻ അത് നന്നായി കൈകാര്യം ചെയ്‌തു; ആരാധകന് മറുപടിയുമായി മാളവിക മോഹനൻ

പ്രശസ്ത തെന്നിന്ത്യൻ നായികാ താരം മാളവിക മോഹനൻ വീണ്ടും മലയാളത്തിലെത്തുന്ന ചിത്രമാണ് ക്രിസ്റ്റി. മാത്യു തോമസ് നായകനായി എത്തുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ കഴിഞ്ഞ ദിവസം പുറത്ത് വന്നിരുന്നു. മാത്യു തോമസിന്റെ നായികാ വേഷമാണ് ഇതിൽ മാളവിക ചെയ്യുന്നത്. ഇരുവരുമൊന്നിച്ചുള്ള ഒരു ചിത്രമാണ് ഇതിന്റെ ഫസ്റ്റ് ലുക്ക് പോസ്റ്ററായി റിലീസ് ചെയ്തിരിക്കുന്നത്. ആ ചിത്രം പങ്ക് വെച്ച് കൊണ്ട് ഒരാരാധകൻ ട്വിറ്ററിൽ കുറിച്ച വാക്കുകൾക്ക് മറുപടിയുമായി എത്തിയിരിക്കുകയാണ് മാളവിക മോഹനൻ. മാളവികയുടെ ഒരു ഗ്ലാമർ ചിത്രവും ക്രിസ്റ്റിയുടെ പോസ്റ്ററും പങ്ക് വെച്ച് കൊണ്ട് ആ ആരാധകൻ കുറിച്ചത്, മാത്യു ഇതെങ്ങനെ കൈകാര്യം ചെയ്യും എന്നോർത്താണ്‌ തനിക്ക് ടെൻഷൻ എന്നാണ്. അതിന് താഴെ മാളവികയുടെ കമന്റുമെത്തി. അവൻ അത് നന്നായി കൈകാര്യം ചെയ്‌തു എന്നാണ് മാളവിക കുറിച്ചിരിക്കുന്നത്.

ഫെബ്രുവരിയിൽ തിയറ്ററുകളിൽ എത്താൻ പോകുന്ന ഈ ചിത്രം നവാഗതനായ ആൽവിൻ ഹെൻറിയാണ് സംവിധാനം ചെയ്തിരിക്കുന്നത്. എഴുത്തുകാരായ ബെന്യാമിനും ജി.ആർ ഇന്ദുഗോപനുമാണ് ഈ ചിത്രത്തിന് തിരക്കഥ രചിച്ചിരിക്കുന്നത്. റോക്കി മൗണ്ടെയ്ൻ സിനിമാസിന്റെ ബാനറിൽ സാജെയ് സെബാസ്റ്റിനും കണ്ണൻ സതീശനും ചേർന്ന് നിർമ്മിച്ച ഈ ചിത്രത്തിന് സംഗീതമൊരുക്കിയത് ഗോവിന്ദ് വസന്തയാണ്. ആനന്ദ് സി ചന്ദ്രൻ ക്യാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് മനു ആന്റണിയാണ്. തണ്ണീർമത്തൻ ദിനങ്ങൾ, കുമ്പളങ്ങി നൈറ്റ്സ്, ജോ ആൻഡ് ജോ, പ്രകാശൻ പറക്കട്ടെ തുടങ്ങി ഒരുപിടി ചിത്രങ്ങളിലൂടെ ശ്രദ്ധ നേടിയ യുവനടനാണ് മാത്യു തോമസ്. പട്ടം പോലെ എന്ന മലയാള ചിത്രത്തിലൂടെ അരങ്ങേറിയ മാളവിക മോഹനൻ, തെന്നിന്ത്യ മുഴുവൻ ശ്രദ്ധ നേടിയത് ദളപതി വിജയ്‌യുടെ നായികയായി മാസ്റ്റർ എന്ന ലോകേഷ് ചിത്രത്തിൽ അഭിനയിച്ചതോടെയാണ്.

ഫോട്ടോ കടപ്പാട്: ട്വിറ്റർ