മക്കളെ വളർത്തുന്നത് എങ്ങനെ; ഷാരൂഖ് ഖാനെയും തന്നെയും താരതമ്യം ചെയ്തവർക്കുള്ള മറുപടിയുമായി മാധവൻ

കുറച്ചു മാസങ്ങൾക്കു മുൻപാണ് ബോളിവുഡ് കിംഗ് ഖാൻ ഷാരൂഖ് ഖാന്റെ മകനായ ആര്യൻ ഖാനെ ഒരു മയക്കു മരുന്ന് കേസുമായി ബന്ധപെട്ടു പോലീസ് അറസ്റ്റ് ചെയ്തതും, പിന്നീട് ആര്യന് അതുമായി ബന്ധമില്ലെന്ന് തിരിച്ചറിഞ്ഞപ്പോൾ വെറുതെ വിട്ടതും. എന്നാൽ ആര്യൻ പുറത്തു വരുന്നത് വരെയുള്ള ദിവസങ്ങളിൽ വലിയ സോഷ്യൽ മീഡിയ ആക്രമണങ്ങളും ട്രോളുകളുമായിരുന്നു ഷാരൂഖ് ഖാനും ആര്യൻ ഖാനും നേരിട്ടത്. അതിലൊരെണ്ണമായിരുന്നു, പ്രശസ്ത നടൻ മാധവൻ തന്റെ മകനെ വളർത്തുന്നത് പോലെ വേണം മക്കളെ വളർത്താനെന്നു പറയുന്നത്. ഷാരൂഖ് ഖാൻ തന്റെ മകൻ ആര്യനെ വളർത്തുന്നതുമായി താരതമ്യം ചെയ്തു കൊണ്ടായിരുന്നു ആ സോഷ്യൽ മീഡിയ ട്രോൾ പ്രചരിച്ചത്. ഇപ്പോഴിതാ അതേ കുറിച്ചുള്ള ചോദ്യത്തിന്, മനോരമ ന്യൂസിന് നൽകിയ അഭിമുഖത്തിൽ മറുപടി നൽകുകയാണ് മാധവൻ.

അതിനു താൻ ഉത്തരം നൽകാനാഗ്രഹകുന്നില്ല എന്നും, തന്റെ മകന് ഒരു മോശം സമയത്തിലൂടെ കടന്നു പോകേണ്ടി വരുമ്പോൾ ഒരച്ഛന് എത്രമാത്രം ദുഃഖം അനുഭവിക്കേണ്ടി വരുമെന്ന് തനിക്കറിയാമെന്നും, ആരും തങ്ങളുടെ മക്കൾക്ക് മോശമായത് സംഭവിക്കുമെന്നറിഞ്ഞു കൊണ്ട് ഒന്നും ചെയ്യില്ലായെന്നും മാധവൻ പറഞ്ഞു. ഈ ട്രോൾ ഉണ്ടാക്കുന്നവർക്കും ഇത്തരം പോസ്റ്റുകൾ പ്രചരിപ്പിക്കുന്നവർക്കുമൊന്നും ആ സമയം ഒരച്ഛനും മകനും കടന്നു പോകുന്ന വേദനയോ സാഹചര്യമോ ഒരല്പം പോലും മനസ്സിലാക്കാൻ സാധിക്കില്ലായെന്നും അദ്ദേഹം വെളിപ്പെടുത്തി. സോഷ്യൽ മീഡിയ അല്ല ലോകമെന്നും, അതിനു പുറത്താണ് നമ്മളെ കുറിച്ചുള്ള ശരിയായ വിലയിരുത്തലുകൾ ഉണ്ടാകുന്നതെന്നും അദ്ദേഹം പറഞ്ഞു. അത്കൊണ്ട് തന്നെ സോഷ്യൽ മീഡിയയിൽ ആരെങ്കിലും എന്തെങ്കിലും പറഞ്ഞുവെന്നത് ആരെയും ബാധിക്കില്ലെന്നും, ഇന്ത്യൻ ജനസംഖ്യയിൽ തന്നെ ഒരു ശതമാനം പോലും ആളുകളിലാത്ത ട്വിറ്റെർ പോലത്തെ പ്ലാറ്റ്‌ഫോമുകളിൽ ഓരോരുത്തർ പറഞ്ഞു നടക്കുന്നതല്ല ലോകം നമ്മളെ കുറിച്ച് പറയുന്നതോ ചിന്തിക്കുന്നതോ ചെയ്യുന്നതെന്നും മാധവൻ പറഞ്ഞു.