ബാഷ മോഡലിൽ ഒരു ദളപതി വിജയ് ചിത്രം; ലോകേഷ് കനകരാജ് ചിത്രം വരുന്നു

വിക്രമെന്ന തന്റെ ഏറ്റവും പുതിയ ചിത്രവും ബ്ലോക്ക്ബസ്റ്റർ വിജയം നേടിയതിന്റെ സന്തോഷത്തിലാണ് സംവിധായകൻ ലോകേഷ് കനകരാജ്. മാനഗരം, കൈതി, മാസ്റ്റർ എന്നീ ചിത്രങ്ങളാണ് ലോകേഷ് ഇതിനു മുൻപ് സംവിധാനം ചെയ്തത്. അതിൽ തന്നെ ദളപതി വിജയ് നായകനായെത്തിയ മാസ്റ്റർ അദ്ദേഹത്തിന്റെ കരിയറിലെ തന്നെ ഏറ്റവും വലിയ വിജയങ്ങളിലൊന്നായി മാറുകയും ചെയ്തു. മാസ്റ്ററിനു ശേഷം വീണ്ടും ദളപതി വിജയ്‌യുമായി ഒന്നിക്കാനുള്ള തയാറെടുപ്പിലാണ് ഇപ്പോൾ ലോകേഷ് കനകരാജ്. ആ ചിത്രത്തെ കുറിച്ചുള്ള കൂടുതൽ വിവരങ്ങളാണ് തമിഴ് മാധ്യമങ്ങളിപ്പോൾ പുറത്തു വിടുന്നത്. ഇതൊരു ഗ്യാങ്സ്റ്റർ ചിത്രമായിരിക്കുമെന്നാണ് ലോകേഷ് കനകരാജ് നേരത്തെ വ്യക്തമാക്കിയത്. ഇപ്പോൾ അതിൽ വിജയ് അവതരിപ്പിക്കാൻ പോകുന്ന കഥാപാത്രത്തെ കുറിച്ചും കൂടുതൽ പുറത്തു വരികയാണ്. നാൽപ്പതു വയസ്സ് കഴിഞ്ഞ ഒരു കഥാപാത്രമായിരിക്കും ഈ ചിത്രത്തിൽ വിജയ് അവതരിപ്പിക്കുകയെന്നതാണ് അതിലൊന്ന്. പിങ്ക് വില്ലയാണ് ഈ വിവരങ്ങൾ പുറത്തു വിട്ടിരിക്കുന്നത്.

രജനികാന്തിന്റെ ബാഷാ സിനിമയിലെ കഥാപാത്രത്തിന്റെ അവതരണത്തിന് സമാനമായിരിക്കും ഈ ചിത്രത്തിൽ വിജയ് കഥാപാത്രത്തെ അവതരിപ്പിക്കുകയെന്നും, ഇതുവരെ കാണാത്ത ഒരു ദളപതിയെ പ്രേക്ഷകരുടെ മുന്നിൽ അവതരിപ്പിക്കാനാണ് ലോകേഷിന്റെ ശ്രമമെന്നും അവർ റിപ്പോർട്ട് ചെയ്യുന്നു. ഡാർക്ക് ഷേഡിൽ ഉള്ള കഥാപാത്രമാകും വിജയ് ഇതിൽ ചെയ്യുകയെന്നും അവരുടെ റിപ്പോർട്ടിൽ സൂചിപ്പിക്കുന്നു. ലോകേഷ് സിനിമാറ്റിക് യൂണിവേഴ്‌സിലേക്ക് ദളപതി വിജയ്‌യെ കൂടി ഈ ചിത്രത്തിലൂടെ എത്തിക്കുമോ എന്നറിയാനുള്ള ആകാംഷയിലാണിപ്പോൾ വിജയ് ആരാധകരും സിനിമ പ്രേമികളും. വിജയ് ചിത്രം കൂടാതെ കൈതി 2, വിക്രം 3, ഇരുമ്പുകൈ മായാവി, ഒരു അല്ലു അർജുൻ ചിത്രമെന്നിവയും ലോകേഷ് പ്ലാൻ ചെയ്യുന്നുണ്ടെന്നാണ് വിവരം.