കൽവത്തി ഡേയ്‌സിന്റെ ലൊക്കേഷൻ കാഴ്ചകൾ എത്തി; പുതുമുഖങ്ങളെ അവതരിപ്പിച്ചു കൊണ്ട് മറ്റൊരു ചിത്രം കൂടി..!

പുതുമുഖങ്ങളെ കേന്ദ്ര കഥാപാത്രമാക്കി നവാഗതനായ നിഷാദ് കെ സലിം രചനയും സംവിധാനവും നിർവഹിക്കുന്ന ചിത്രമാണ് കൽവത്തി ഡേയ്സ്. ദിവസങ്ങൾക്കു മുൻപ് ഇതിന്റെ ടൈറ്റിൽ പോസ്റ്റർ പുറത്തു വന്നിരുന്നു. ഇപ്പോഴിതാ ഈ ചിത്രത്തിന്റെ രസകരമായ ലൊക്കേഷൻ വീഡിയോയും അണിയറ പ്രവർത്തകർ പുറത്തു വിട്ടിരിക്കുകയാണ്. സിനിമയിൽ ചാൻസ് ചോദിച്ചു നടന്നവരെല്ലാം ഒരുമിച്ച് ഒരു സിനിമയെടുത്താൽ എങ്ങനെയിരിക്കും എന്ന ക്യാപ്‌ഷൻ ഇട്ടാണ് അവർ ഈ വീഡിയോ തങ്ങളുടെ ഒഫീഷ്യൽ ഫേസ്ബുക് പേജിലൂടെ പുറത്തു വിട്ടിരിക്കുന്നത്. ഈ വീഡിയോയിൽ പെർഫോം ചെയ്യുന്ന യുവാവും പ്രേക്ഷക ശ്രദ്ധ നേടുന്നുണ്ട്.

വർഷങ്ങളോളം സിനിമയിൽ ജൂനിയർ ആർട്ടിസ്റ്റുകളായി പിൻനിരയിൽ നിന്ന കുറച്ചു പുതുമുഖങ്ങളെ മലയാള സിനിമയുടെ മുൻനിരയിലേക്ക് എത്തിക്കുന്ന ചിത്രമാണ് കൽവത്തി ഡേയ്സ്. ഇ എം എന്റർടൈൻമെൻറ്സിന്റെ ബാനറിൽ തോമസ് ജോർജ്, ജിബിൻ കടുത്തുസ് എന്നിവരാണ് ഈ ചിത്രത്തിന്റെ നിർമ്മാണം നിർവഹിക്കുന്നത്. കൽവത്തിയിലെ ഒരു കല്യാണ രാത്രിയുടെ ഷൂട്ട് ആണ് ഇപ്പോൾ നടക്കുന്നത്. ആ ലൊക്കേഷനിൽ നിന്നുള്ള രസകരമായ കാഴ്ചകളാണ് പുറത്തു വന്ന വീഡിയോയിൽ ഉൾപ്പെടുത്തിയിരിക്കുന്നത്. ഈ വീഡിയോയിൽ ചിത്രത്തിൽ പ്രവർത്തിക്കുന്ന പലരെയും പ്രേക്ഷകർക്ക് പരിചയപ്പെടുത്തുന്നുമുണ്ട്. ജോമോൻ കെ പോൾ ഛായാഗ്രഹണം നിർവഹിക്കുന്ന ഈ ചിത്രത്തിന് വേണ്ടി സംഗീത സംവിധാനം ചെയ്യുന്നത് നിസാം എച്, ഷൈജു അവറാൻ എന്നിവർ ആണ്.