പൊഖ്‌റാൻ കോട്ടയിൽ ഒരുങ്ങുന്നത് വമ്പൻ സംഘട്ടന രംഗം; വിദേശ താരങ്ങളും നിറഞ്ഞ മലൈക്കോട്ടൈ വാലിബൻ ലൊക്കേഷൻ ചിത്രങ്ങൾ കാണാം

മലയാളത്തിന്റെ മഹാനടൻ മോഹൻലാലിനെ നായകനാക്കി ലിജോ ജോസ് പെല്ലിശ്ശേരി ആദ്യമായി സംവിധാനം ചെയ്യുന്ന ചിത്രമാണ് മലൈക്കോട്ടൈ വാലിബൻ. ഈ വർഷം ജനുവരി പതിനെട്ടിന് രാജസ്ഥാനിലെ ജയ് സാൽമീറിലാണ് ഇതിന്റെ ഷൂട്ടിംഗ് ആരംഭിച്ചത്. അവിടുത്തെ ഒരു മാസത്തെ ഷൂട്ടിങ്ങിന് ശേഷം ഇപ്പോഴിതാ രാജസ്ഥാനിലെ പൊഖ്‌റാൻ കോട്ടയിൽ ഈ ചിത്രത്തിന്റെ ഇരുപതു ദിവസത്തെ ഷെഡ്യൂൾ ആരംഭിച്ചിരിക്കുകയാണ്. വമ്പൻ സംഘട്ടന രംഗമാണ് അവിടെ ഒരുക്കുന്നത് എന്നാണ് സൂചന. ഇപ്പോൾ പൊഖ്‌റാനിൽ നിന്നുള്ള ലൊക്കേഷൻ ചിത്രങ്ങൾ, വീഡിയോ എന്നിവ വൈറലായി മാറുകയാണ്. വിദേശ ഭാഷ നടീനടമാരും ജൂനിയർ ആർട്ടിസ്റ്റുകളും ഉൾപ്പെടെ വലിയ താരനിരയാണ് ഈ രംഗങ്ങളിൽ പങ്കെടുക്കുന്നത്. ബ്രിട്ടീഷ് ഭരണ കാലഘട്ടത്തിൽ നടക്കുന്ന കഥയാണ് ഈ ചിത്രം പറയുന്നതെന്ന സൂചനയാണ് ഇതിന്റെ ലൊക്കേഷൻ ചിത്രങ്ങളിൽ നിന്നും ലഭിക്കുന്നത്.

പൊഖ്‌റാനിലെ 20 ദിവസത്തെ ചിത്രീകരണം കഴിഞ്ഞ് വീണ്ടും ജയ് സാൽമീരിലേക്കു ഷൂട്ടിംഗ് സംഘം തിരിച്ചു വരും. ബിഗ് ബഡ്ജറ്റിൽ ഒരുക്കുന്ന ഈ ചിത്രത്തിന്റെ കഥ രചിച്ചത് ലിജോ ജോസ് പെല്ലിശ്ശേരിയും തിരക്കഥ രചിച്ചത് പി എഫ് റഫീക്കുമാണ്. ഷിബു ബേബി ജോണിന്റെ ജോൺ മേരി ക്രീയേറ്റീവ്, സെഞ്ച്വറി ഫിലിംസ്, മാക്സ്‌ലാബ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് മധു നീലകണ്ഠൻ, സംഗീതമൊരുക്കുന്നത് പ്രശാന്ത് പിള്ളൈ, എഡിറ്റ് ചെയ്യുന്നത് ദീപു ജോസഫ് എന്നിവരാണ്. മോഹൻലാൽ ഒരു പ്രായമുള്ള ഗുസ്തിക്കാരനായി വേഷമിടുന്ന ഈ പീരീഡ് ചിത്രത്തിൽ കാത്ത നന്ദി, രാജ്പാൽ യാദവ്, സോണാലി കുൽക്കർണി, ഹരീഷ് പേരാടി, ഡാനിഷ് സേഥ്, ഹരിപ്രശാന്ത്, മണികണ്ഠൻ ആചാരി, സുചിത്ര, രാജീവ് പിള്ളൈ എന്നിവരും അഭിനയിക്കുന്നുണ്ട്.