വീണ്ടും സാധാരണക്കാരന്റെ വേഷത്തിൽ മമ്മൂട്ടി; ലിജോ ജോസ് പെല്ലിശ്ശേരി ചിത്രത്തിന്റെ ലൊക്കേഷൻ ചിത്രങ്ങൾ കാണാം..!

മെഗാ സ്റ്റാർ മമ്മൂട്ടിയെ നായകനാക്കി ലിജോ ജോസ് പെല്ലിശ്ശേരി ആദ്യമായി സംവിധാനം ചെയ്യുന്ന ചിത്രത്തിന്റെ ചിത്രീകരണം ആണ് ഇപ്പോൾ പുരോഗമിച്ചു കൊണ്ടിരിക്കുന്നത്. തമിഴിലും മലയാളത്തിലുമായി ഒരുക്കുന്ന ഈ ചിത്രത്തിന്റെ ഷൂട്ടിംഗ് പഴനിയിൽ ആണ് നടക്കുന്നത്. നൻപകൽ നേരത്ത് മയക്കം എന്നാണ് ഈ ചിത്രത്തിന് നൽകിയിരിക്കുന്ന പേര്. ഇപ്പോഴിതാ ഇതിന്റെ ലൊക്കേഷനിൽ നിന്നുള്ള ചിത്രങ്ങൾ ശ്രദ്ധ നേടുകയാണ്. വളരെ സാധാരണക്കാരൻ ആയാണ് മമ്മൂട്ടി ഈ ചിത്രത്തിൽ അഭിനയിക്കുന്നത് എന്നാണ് അദ്ദേഹത്തിന്റെ വേഷവിധാനങ്ങൾ നൽകുന്ന സൂചന. അതുപോലെ ഒരു കള്ളന്റെ വേഷത്തിലാണ് മമ്മൂട്ടി ഈ ചിത്രത്തിൽ അഭിനയിക്കുന്നത് എന്നും സ്ഥിതീകരിക്കാത്ത റിപ്പോർട്ടുകൾ പറയുന്നുണ്ട്. ഏതായാലും ഒരിടവേളക്ക് ശേഷം ഒരു സാധാരണക്കാരന്റെ വേഷത്തിൽ മമ്മൂട്ടി അഭിനയിക്കുന്നു എന്നത് തന്നെയാണ് ഈ ചിത്രത്തിന്റെ പ്രത്യേകത.

തന്റെ പുതിയ നിർമ്മാണ കമ്പനിയായ മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമ്മിക്കുന്ന ഈ ചിത്രത്തിന് തിരക്കഥ രചിച്ചിരിക്കുന്നത് എസ് ഹരീഷ് ആണ്. മമ്മൂട്ടിക്കൊപ്പം പ്രശസ്ത നടൻ അശോകനും ഈ ചിത്രത്തിൽ പ്രധാന വേഷം ചെയ്യുന്നുണ്ട്. നടി രമ്യ പാണ്ഢ്യനും അഭിനയിക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് തേനി ഈശ്വർ ആണ്. ളരെ വ്യത്യസ്തമായിട്ടു കഥ പറയുന്ന ഒരു സിനിമയാണ് ഇതെന്നും ചിത്രത്തിലെ എല്ലാ കഥാപാത്രങ്ങളും അങ്ങനെ തന്നെയാണ് എന്നും അശോകൻ പറഞ്ഞത് നേരത്തെ ശ്രദ്ധ നേടിയിരുന്നു. ഈ ചിത്രത്തിന് ശേഷം എം ടി വാസുദേവൻ നായരുടെ രചനയിൽ ഒരുങ്ങുന്ന ആന്തോളജി ചിത്രത്തിലെ ഒരു ഭാഗവും ലിജോ ജോസ് പെല്ലിശ്ശേരി- മമ്മൂട്ടി ടീം ഒരുക്കും.