മോഹൻലാൽ ചിത്രത്തിന് ശേഷം സൂര്യ ചിത്രം ചെയ്യാൻ ലിജോ ജോസ് പെല്ലിശ്ശേരി?

മലയാളത്തിന്റെ മഹാനടൻ മോഹൻലാൽ നായകനായ മലൈക്കോട്ടൈ വാലിബൻ എന്ന ചിത്രം ഒരുക്കാനുള്ള തയ്യാറെടുപ്പിലാണ് ഇപ്പോൾ ലിജോ ജോസ് പെല്ലിശേരി. ഒരു മാസ്സ് പീരീഡ് ഡ്രാമയായി ഒരുക്കാൻ പോകുന്ന ഈ ചിത്രത്തിന്റെ ഷൂട്ടിംഗ് വരുന്ന ജനുവരി പതിനെട്ടിന് രാജസ്ഥാനിലെ ജയ് സാൽമീറിൽ ആരംഭിക്കും. ഇപ്പോഴിതാ ഈ ചിത്രത്തിന് ശേഷം ഒരു തമിഴ് ചിത്രം ഒരുക്കാനുള്ള തയ്യാറെടുപ്പിലാണ് ലിജോ എന്നും, തമിഴിലെ നടിപ്പിൻ നായകൻ സൂര്യ ആയിരിക്കും ആ ചിത്രത്തിലെ നായകൻ എന്നുമുള്ള ചില വാർത്തകളാണ് പുറത്ത് വരുന്നത്. ലിജോ സൂര്യയോട് ഒരു കഥ നേരത്തെ തന്നെ പറഞ്ഞിട്ടുണ്ടെന്നും, അല്പം വൈകിയാലും ആ ചിത്രം നടക്കുമെന്നാണ് പ്രതീക്ഷയെന്നും പറയുന്നത് പ്രശസ്ത സംഘട്ടന സംവിധായകനായ സുപ്രീം സുന്ദറാണ്. ഗലാട്ട എന്ന തമിഴ് മാധ്യമത്തിന് നൽകിയ അഭിമുഖത്തിലാണ് അദ്ദേഹം ഈ കാര്യം വെളിപ്പെടുത്തിയത്.

തല അജിത് നായകനായി എത്തിയ ഏറ്റവും പുതിയ ചിത്രമായ തുനിവിന് സംഘട്ടനം ഒരുക്കിയത് സുപ്രീം സുന്ദറാണ്. ആ ചിത്രത്തിലെ 360 ഡിഗ്രി ഫൈറ്റിനു വലിയ കയ്യടിയാണ് പ്രേക്ഷകരിൽ നിന്നും ലഭിക്കുന്നത്. ആ ചിത്രത്തിന്റെ പ്രമോഷന്റെ ഭാഗമായി നൽകിയ അഭിമുഖത്തിലാണ് അദ്ദേഹം സൂര്യ- ലിജോ ജോസ് പെല്ലിശ്ശേരി ചിത്രത്തെ കുറിച്ച് വെളിപ്പെടുത്തിയത്. ലിജോ ജോസ് പെല്ലിശേരി- മോഹൻലാൽ ചിത്രത്തിന് സംഘട്ടന സംവിധാനം നിർവഹിക്കുന്നത് വിക്രം മോർ ആണ്. കെ ജി എഫ്, കാന്താര എന്നീ ചിത്രങ്ങൾക്ക് വേണ്ടി സംഘട്ടനം ഒരുക്കി കയ്യടി നേടിയ ആളാണ് വിക്രം മോർ. ഗുസ്തിയുടെ പശ്ചാത്തലത്തിലാണ് മോഹൻലാൽ- ലിജോ ചിത്രം ഒരുങ്ങുന്നതെന്നാണ് സൂചന.