രൂപത്തിലും ഭാവത്തിലും വൈ എസ് രാജശേഖര റെഡ്ഢി ആയി മമ്മൂട്ടി; യാത്രയിലെ പുതിയ സ്റ്റില്ലുകൾ ശ്രദ്ധ നേടുന്നു..!

മെഗാസ്റ്റാർ മമ്മൂട്ടി ഒരുപാട് വർഷങ്ങൾക്കു ശേഷം തെലുങ്കിൽ അഭിനയിക്കുന്ന ചിത്രമാണ് യാത്ര. അന്തരിച്ചുപോയ മുൻ ആന്ധ്രാ മുഖ്യമന്ത്രി ആയിരുന്ന വൈ എസ് രാജശേഖര റെഡ്ഢിയുടെ ജീവിത കഥ പറയുന്ന ഈ ചിത്രം സംവിധാനം ചെയ്യുന്നത് മഹി വി രാഘവ് എന്ന സംവിധായകനാണ്. ഈ ചിത്രത്തിന്റെ ഒരു ടീസറും അതുപോലെ ഗാനത്തിന്റെ ലിറിക്കൽ വിഡിയോയും പുറത്തു വരികയും പ്രേക്ഷക ശ്രദ്ധ നേടുകയും ചെയ്തു. ഇപ്പോൾ ഈ ചിത്രത്തിലെ മമ്മൂട്ടിയുടെ കൂടുതൽ സ്റ്റില്ലുകൾ പുറത്തു വന്നിരിക്കുകയാണ്. നോട്ടത്തിലും രൂപത്തിലും ഭാവത്തിലും വൈ എസ് ആറിനെ അനുസ്മരിപ്പിക്കുന്ന മമ്മൂട്ടിയുടെ പുതിയ സ്റ്റില്ലുകൾ സോഷ്യൽ മീഡിയയിൽ ഏറെ ശ്രദ്ധ നേടിയെടുക്കുകയാണ് ഇപ്പോൾ. ആദ്യം റിലീസ് ആയ ടീസറിലെ മമ്മൂട്ടിയുടെ തെലുങ്ക് ഡയലോഗിനും ഏറെ പ്രശംസ കിട്ടിയിരുന്നു.

വർഷങ്ങൾക്കു ശേഷം തെലുങ്കിൽ അഭിനയിക്കുമ്പോൾ ഈ ഭാഷയിലെ തന്റെ ആദ്യ ബോക്സ് ഓഫീസ് വിജയം കൂടിയാണ് മമ്മൂട്ടി ലക്ഷ്യമിടുന്നത്. അടുത്ത വർഷം ആദ്യം യാത്ര പ്രദർശനത്തിന് എത്തും എന്നാണ് ഇപ്പോൾ ലഭിക്കുന്ന റിപ്പോർട്ടുകൾ സൂചിപ്പിക്കുന്നത്. മനമന്ത, ജനത ഗാരേജ്, മന്യം പുലി തുടങ്ങിയ വിജയ ചിത്രങ്ങളിലൂടെ കമ്പ്ലീറ്റ് ആക്ടർ മോഹൻലാൽ തെലുങ്കിൽ സൂപ്പർ താരത്തിനൊത്ത മാർക്കറ്റു നേടിയെടുത്തപ്പോൾ , മമ്മൂട്ടിയുടെ മകനും യുവ താരവുമായ ദുൽകർ സൽമാനും മഹാനടി എന്ന തന്റെ ആദ്യ തെലുങ്ക് ചിത്രത്തിലൂടെ തന്നെ അവിടുത്തെ പ്രേക്ഷകരുടെ ശ്രദ്ധ പിടിച്ചു പറ്റി. യാത്രയിലൂടെ മമ്മൂട്ടിയും അവിടെ വിജയം നേടിയാൽ മലയാള സിനിമയ്ക്കു തെലുങ്കിൽ തുറന്നു കിട്ടാൻ പോകുന്നത് എക്കാലത്തെയും വലിയ ഒരു മാർക്കറ്റ് തന്നെയാവും എന്നുറപ്പാണ്. വലിയ ബഡ്ജറ്റിൽ ഒരുക്കുന്ന യാത്ര നിർമ്മിക്കുന്നത് വിജയ് ചില്ലയും ശശിദേവി റെഡ്ഢിയും ചേർന്നാണ്