രണ്ടു ഇതിഹാസങ്ങൾ അവസാനമായി ഒന്നിച്ച്; ഭീഷ്മ പർവ്വത്തിലെ ആ രംഗം..!

കഴിഞ്ഞ വർഷം അവസാനം നമ്മളെ വിട്ടു പിരിഞ്ഞത് മലയാള സിനിമയിലെ നടനവിസ്മയമായ നെടുമുടി വേണു ആയിരുന്നു എങ്കിൽ ഈ കഴിഞ്ഞ ദിവസം നമ്മളോട് വിട പറഞ്ഞത് മലയാള സിനിമയിലെ മറ്റൊരു ഇതിഹാസമായിരുന്ന കെ പി എ സി ലളിത ആണ്. മലയാള സിനിമാ പ്രേമികളെ തങ്ങളുടെ പ്രകടനങ്ങളിലൂടെ വിസ്മയിപ്പിച്ച ഇവർ രണ്ടു പേരും ഒട്ടേറെ ഗംഭീര കഥാപാത്രങ്ങളെ ആണ് നമ്മുടെ മുന്നിൽ എത്തിച്ചിട്ടുള്ളത്. ഒരുപാട് ചിത്രങ്ങളിൽ ഒരുമിച്ചഭിനയിക്കുകയും ചെയ്തിട്ടുണ്ട് ഇവർ. ഏതായാലും ഇവരെ അവസാനമായി ഒരുമിച്ചു സ്‌ക്രീനിൽ കാണാൻ കഴിയുന്ന ചിത്രമാകും മമ്മൂട്ടി നായകനായി എത്തുന്ന ഭീഷ്മ പർവ്വം. അമൽ നീരദ് ഒരുക്കിയ ഈ ചിത്രത്തിന്റെ ട്രൈലെർ ഇന്നലെ രാത്രി പുറത്തു വന്നു. ആ ട്രെയിലറിലെ ഏറ്റവും അവസാന രംഗത്തിൽ നമ്മുക്ക് കാണാൻ കഴിയുന്നത്, നെടുമുടി വേണു, കെ പി എ സി ലളിത എന്നിവരെ ഒരുമിച്ചാണ്. ഒരുപാട് ഓർമ്മകൾ പ്രേക്ഷകരുടെ മനസ്സിലേക്ക് എത്തിക്കുന്ന ഒരു രംഗം കൂടിയാണ് അതെന്നു പറയേണ്ടി വരും.

ഇരവി പിള്ള എന്ന കഥാപാത്രം ആയാണ് നെടുമുടി വേണു ഈ ചിത്രത്തിൽ അഭിനയിച്ചിരിക്കുന്നത് എങ്കിൽ, കാർത്യായനിയമ്മ എന്ന കഥാപാത്രം ആയാണ് കെ പി എ സി ലളിത പ്രത്യക്ഷപ്പെടുന്നത്. മോഹൻലാൽ നായകനായി കഴിഞ്ഞ ആഴ്ച റിലീസ് ചെയ്ത ആറാട്ട് എന്ന ചിത്രത്തിലും അതിഥി വേഷത്തിൽ നെടുമുടി വേണുവിനെ നമ്മൾ കണ്ടിരുന്നു. അതുപോലെ മമ്മൂട്ടി നായകനായി ഇനി എത്താനുള്ള പുഴു, ജയരാജ് ഒരുക്കിയ ഒരു ചിത്രം എന്നിവയിലും നെടുമുടി വേണുവിനെ നമ്മുക്ക് കാണാൻ സാധിക്കും എന്നാണ് സൂചന. അമൽ നീരദ്, ദേവദത് ഷാജി എന്നിവർ ചേർന്ന് രചിച്ചു, അമൽ നീരദ് തന്നെ നിർമ്മിച്ച ഭീഷ്മ പർവ്വം മാർച്ച് മൂന്നിന് ആണ് റിലീസ് ചെയ്യുക.