ഇനി ബേബി എസ്തർ അല്ല.. എസ്തർ അനില്‍ നായിക ആകുന്നു

ബാലതാരമായി വന്നു പ്രേക്ഷകമനസ്സിൽ ഇടം നേടിയ ഒട്ടേറെ താരങ്ങൾ പിന്നീട് നായികമാരായി വന്നത് നമ്മൾ കണ്ടതാണ്. ശാലിനി, കാവ്യാ മാധവൻ, ശ്യാമിലി, കീർത്തി സുരേഷ്, സനുഷ സന്തോഷ് തുടങ്ങിയ ആ നീണ്ട ലീസ്റ്റിലേക്ക് പുതിയ ഒരാള് കൂടെ. ബേബി എസ്തർ.. അല്ല.. എസ്തർ അനിൽ.. 2010 ൽ ഇറങ്ങിയ ജയസൂര്യ ചിത്രം നല്ലവനിലൂടെ അഭിനയ രംഗത്ത് എത്തിയ എസ്തർ നായികയായി അരങ്ങേറ്റം കുറിക്കുകയാണ്. തമിഴ് ചിത്രം ‘കുഴലി’ലിലൂടെയാണ് എസ്തർ നായികയാകുന്നത്. പുതുമുഖ സംവിധായകൻ കലൈയരശനാണ് ഈ സിനിമ ഒരുക്കുന്നത്. കാക്കമുട്ടൈ എന്ന ചിത്രത്തിൽ അഭിനയിച്ച വിഘ്‌നേശ് ആണ് നായകനാകുന്നത്. മൊബൈൽ ഫോണിന് റേഞ്ച് ഇല്ലാത്ത ഒരു ഗ്രാമത്തിന്റെ പശ്ചാത്തലത്തിൽ പറയുന്ന കഥയിൽ നന്നായി പഠിക്കുന്ന രണ്ടുപേർക്ക് സംഭവിക്കുന്ന പ്രണയവും ദുരന്തവുമാണ് പറയുന്നത്.

ഹലീദ ഷമീം സംവിധാനം ചെയ്യുന്ന മിന്മിഴി എന്നൊരു ചിത്രം കൂടെ എസ്തരിന്റെതായി തമിഴിൽ ഒരുങ്ങുന്നുണ്ട്. ഈ രണ്ട് തമിഴ് ചിത്രങ്ങളും എസ്തറിന് തമിഴ് നാട്ടിൽ മൈലേജ് ഉണ്ടാക്കി കൊടുക്കുമെന്ന് ഉറപ്പ്.

തമിഴിൽ മാത്രമല്ല, മലയാളത്തിലും എസ്തരിനെ കാത്ത് സിനിമകളുണ്ട്. അവാർഡ് ജേതാവ് ഷാജി എൻ കരുൺ സംവിധാനം ചെയ്യുന്ന ഓള് എന്ന ചിത്രത്തിലാണ് മലയാളത്തിൽ ഇനി എസ്തർ അനിൽ അഭിനയിക്കുക.

7 വർഷങ്ങൾ കൊണ്ട് 21 സിനിമയുടെ ഭാഗമായിട്ടുണ്ട് ഈ കൊച്ചു മിടുക്കി. അതിൽ മോഹൻലാൽ, മമ്മൂട്ടി, കമലഹാസൻ സിനിമകളും പെടും. മോഹൻലാൽ ചിത്രം ദൃശ്യത്തിലൂടെയാണ് എസ്തർ പ്രേക്ഷകരുടെ പ്രിയ ബാലതാരം ആകുന്നത്. ദൃശ്യം തെലുങ്കിലും തമിഴിലും റീമേക്ക് ചെയ്‌തപ്പോഴും എസ്തർ തന്നെയായിരുന്നു ആ വേഷം അവതരിപ്പിച്ചത്.

കാക്കനാട് രാജഗിരി ക്രിസ്തുജയന്തി പബ്ലിക്ക് സ്‌കൂളിലെ പ്ലസ് വൺ വിദ്യാർത്ഥിനിയാണ് എസ്തർ അനിൽ ഇപ്പോൾ.