ദേശീയ അവാർഡ് ജേതാവിന്റെ ചിത്രത്തിൽ കുഞ്ചാക്കോ ബോബനും നിമിഷ സജയനും ഒന്നിക്കുന്നു..

കുട്ടനാടൻ മാർപ്പാപ്പയുടെ വിജയത്തിന് ശേഷം കുഞ്ചാക്കോ ബോബൻ നായകനായി എത്തുന്ന പുതിയ ചിത്രത്തിന്റെ ഷൂട്ടിങ് ആരംഭിക്കുന്നു. ഡോക്കുമെന്ററിയിലൂടെ ദേശീയ ചലച്ചിത്ര അവാർഡ് കരസ്ഥമാക്കിയ സൗമ്യ സദാനന്ദൻ ആണ് ചിത്രത്തിന്റെ സംവിധാനം. ഫാമിലി സറ്റയർ ആയാണ് ചിത്രം ഒരുക്കുന്നത്. തൊണ്ടിമുതലും ദൃക്‌സാക്ഷിയും എന്ന ചിത്രത്തിലൂടെ മലയാളികൾക്ക് പ്രിയങ്കരിയായി മാറിയ നിമിഷ സജയനാണ് ചിത്രത്തിൽ നായികാ വേഷം കൈകാര്യം ചെയ്യുന്നത്. ചിത്രത്തിന്റെ ഷൂട്ടിംഗ് നാളെ തൊടുപുഴയിൽ ആരംഭിക്കും. നവാഗതനായ സോണി മടത്തിലാണ് ചിത്രത്തിനായി തിരക്കഥ രചിച്ചിരിക്കുന്നത്. UGM പ്രൊഡക്ഷൻസ് ചിത്രം നിർമ്മിക്കുന്നു. ചിത്രത്തിലൂടെ മികച്ച കഥാപാത്രമായി എത്താൻ മല്ലിക സുകുമാരനും ഒപ്പമുണ്ട്. വളരെ കൗതുകമുണർത്തുന്ന ക്ഷണക്കത്താണ് ചിത്രത്തിന്റെ പൂജയോട് അനുബന്ധിച്ചു ഒരുക്കിയത്.

കപ്പാ ടിവിയിലെ ഫിലിം ലോഞ്ച് എന്ന പരിപാടിയുടെ അവതരണത്തിലൂടെ ആയിരുന്നു സൗമ്യ സുപരിചിതയായി മാറിയത്. നാല് വർഷത്തോളം സൗമ്യ അവതാരകയായി പ്രേക്ഷകർക്ക് മുൻപിലെത്തി പിന്നീട് ഹസ്ര്വ ചിത്രങ്ങളും സൗമ്യ സംവിധാനം ചെയ്തു. ആഖ്യാനത്തിലെ വ്യത്യസ്തത കൊണ്ട് സൗമ്യയുടെ സംവിധാന മികവിൽ ഒരുങ്ങിയ ചിത്രങ്ങൾ എല്ലാം തന്നെ ശ്രദ്ധിക്കപ്പെട്ടു. മിസ്റ്റിക് എൻകൗണ്ടർ എന്ന ഹ്രസ്വ ചിത്രമാണ് സൗമ്യ ആദ്യമായി സംവിധാനം ചെയ്തത്. 2016 ൽ ചെമ്പൈ എന്ന ഡോക്കുമെന്ററിയിലൂടെ ദേശീയ അവാർഡും സൗമ്യയെ തേടി വന്നിരുന്നു. തൊണ്ടിമുതലിന്റെ വിജയത്തിന് ശേഷം നിമിഷയും വിജയ തുടർച്ച കുതിപ്പ് തുടരാൻ കുഞ്ചാക്കോ ബോബനും ദേശീയ അവാർഡ് ജേതാവിനൊപ്പം എത്തുമ്പോൾ മികച്ച ചിത്രം പ്രതീക്ഷിക്കാം.