തിയേറ്ററുകളിൽ ചിരിപ്പൂരം ഒരുക്കാൻ കുട്ടനാടൻ മാർപാപ്പ നാളെ മുതൽ, കുട്ടനാടൻ മാർപാപ്പയുടെ തിയേറ്റർ ലിസ്റ്റ് ഇതാ ..

തിയേറ്ററിൽ ചിരിപ്പൂരം ഒരുക്കാൻ കുട്ടനാട്ടുകാർ ഒരുങ്ങി കഴിഞ്ഞു. ജോണും കൂട്ടരും നാളെ തിയേറ്ററുകളിലേയ്ക്ക് എത്തുകയാണ്. ചിത്രത്തിന്റെ തിയേറ്റർ ലിസ്റ്റ് പുറത്തു വിട്ടു. നവാഗതനായ ശ്രീജിത് വിജയൻ രചനയും സംവിധാനവും നിർവഹിച്ച കുട്ടനാടൻ മാർപാപ്പ ജോൺ എന്ന ഫോട്ടോഗ്രാഫറുടെ കഥ പറയുന്നു. അമ്മയും സുഹൃത്തുക്കളും അടങ്ങിയ കുട്ടനാട്ടുകാരനായ ജോണിന്റെ ജീവിതത്തിലേക്ക് അവിചാരിതമായി ജെസ്സി എന്ന ഒരു പെണ്കുട്ടി കടന്നു വരുന്നതാണ് ചിത്രത്തിന്റെ പ്രധാന ഇതിവൃത്തം. നായകനായ ജോണിനെ കുഞ്ചാക്കോ ബോബൻ അവതരിപ്പിക്കുമ്പോൾ, അമ്മയായി എത്തുന്നത് ഒരിടവേളയ്ക്ക് ശേഷം മലയാളത്തിൽ സജീവമായി മാറിയ ശാന്തി കൃഷ്ണ ആണ്. ജോണിന്റെ ജീവിതത്തിലേക്ക് കടന്നു വരുന്ന ജെസ്സിയുടെ കഥാപാത്രത്തെ അവതരിപ്പിക്കുന്നത് അതിഥി രവിയാണ്.

ഈസ്റ്റർ റിലീസ് ആയി നാളെ തിയേറ്ററുകളിൽ എത്തുന്ന ചിത്രം ശിക്കാരി ശംഭുവിന്റെ വിജയത്തിന് ശേഷം ഈ വർഷം എത്തുന്ന രണ്ടാമത്തെ കുഞ്ചാക്കോ ബോബൻ ചിത്രമാണ്. ഹാസ്യ താരങ്ങൾ ആയ സലിം കുമാർ, ഇന്നസെന്റ്, സൗബിൻ, ധർമജൻ, രമേഷ് പിഷാരടി, ഹരീഷ് കണാരൻ, അജുവർഗീസ് തുടങ്ങി ഒരു നീണ്ട നിര തന്നെ ചിരിയുത്സവതിനായി അണി നിരക്കുന്നു. രാഹുൽ രാജ് ഈണം പകർന്ന് പുറത്തിറങ്ങിയ ചിത്രത്തിലെ ആദ്യ ഗാനം വളരെയധികം ശ്രദ്ധ നേടിയിരുന്നു ഗാനത്തിലെ കുഞ്ചാക്കോ ബോബൻ നൃത്തവും സോഷ്യൽ മീഡിയയിൽ മികച്ച പ്രതികരണം കരസ്ഥമാക്കിയിരുന്നു. ഹസീബ്, നൗഷാദ്, അജി തുടങ്ങിയവർ ആണ് ചിത്രം നിർമ്മിച്ചിരിക്കുന്നത് ചിത്രത്തിന്റെ ഛായാഗ്രഹണം അരവിന്ദ് കൃഷ്ണ നിർവഹിച്ചിരിക്കുന്നു. ശിക്കാരി ശംഭുവിന്റെ വിജയത്തിന് ശേഷം വരുന്ന ചിത്രം ആയത് കൊണ്ട് തന്നെ കുഞ്ചാക്കോ ബോബൻ ആരാധകരും വൻ പ്രതീക്ഷയിലാണ്. ഈസ്റ്ററിന് പൊട്ടിച്ചിരി ഉണർത്താൻ നാളെ ചിത്രം തിയേറ്ററുകളിൽ..