ഒരു ഫോട്ടോ ഉപയോഗിച്ച് ഒരു മുഴുനീള കഥാപാത്രം സൃഷ്ട്ടിക്കാൻ കഴിഞ്ഞ സംവിധായകനാണ് ഈ വിജയത്തിന്റെ ക്രെഡിറ്റ്; മറിയം വന്നു വിളക്കൂതി എന്ന ചിത്രത്തെ പ്രശംസിച്ചു കോട്ടയം പ്രദീപ്

നവാഗതനായ ജെനിത് കാച്ചപ്പിള്ളി രചിച്ചു സംവിധാനം ചെയ്ത ചിത്രമാണ് മറിയം വന്നു വിളക്കൂതി. സൂപ്പർ വിജയം നേടി മുന്നേറുന്ന ഈ ചിത്രം ഒരു കംപ്ലീറ്റ് ഫൺ ഫിലിമാണെന്നാണ് ഏവരും ഒരേ സ്വരത്തിൽ പറയുന്നത്. സിജു വിൽസൺ, കൃഷ്ണ ശങ്കർ, ശബരീഷ് വർമ്മ, അൽത്താഫ് എന്നിവർ അവതരിപ്പിച്ചിരിക്കുന്ന കഥാപാത്രങ്ങളുടെ ചുറ്റുമാണ് ഈ ചിത്രം വികസിക്കുന്നത്. ഷിയാസ്, ബൈജു, ബേസിൽ ജോസെഫ്, സേതുലക്ഷ്മി, ഐറീൻ എന്നിവരും അഭിനയിച്ചിരിക്കുന്നു ഈ ചിത്രം നിർമ്മിച്ചിരിക്കുന്നത് എ ആർ കെ മീഡിയയുടെ ബാനറിൽ രാജേഷ് അഗസ്റ്റിൻ, രാഗം മൂവസിന്റെ ബാനറിൽ രാജു മല്യത് അതുപോലെ സെഞ്ച്വറി ഫിലിംസ് എന്നിവർ ചേർന്നാണ്. ഇപ്പോഴിതാ ഈ ചിത്രത്തിന് പ്രശംസയുമായി എത്തിയിരിക്കുന്നത് പ്രശസ്ത നടൻ കോട്ടയം പ്രദീപാണ്.

അദ്ദേഹത്തിന്റെ ഫേസ്ബുക് പോസ്റ്റ് ഇങ്ങനെ, മറിയം വന്ന് വിളക്കൂതി, കുറച്ചു നാളു മുൻപ് കുറച്ചു പിള്ളേരു വീട്ടിൽ വന്നു അവരുടെ ചിത്രത്തിനു വേണ്ടി ആണ് എന്ന് പറഞ്ഞു എന്റെ കുറച്ചു ഫോട്ടോസ് എടുത്തു. പിന്നെ അടുത്തിടക്ക് അവര് വിളിച്ചു ചേട്ടാ ഒന്ന് രണ്ട് ഡയലോഗ് പറയണമെന്ന് പറഞ്ഞു അതും എടുത്തു പോയിരുന്നു. ഇത്രമാത്രമാണ് എനിക്കും ഈ സിനിമക്കും തമ്മിലുള്ള ബന്ധം. പിന്നെ ഇന്നലെ ആളുകളൊക്കെ മെസ്സേജ് ചെയുന്നു വിളിക്കുന്നു, അവസാനത്തെ ചേട്ടന്റെ ഭാഗത്തു നല്ല ചിരി ഉണ്ടായിരുന്നു, ഈ സിനിമയിൽ കൊള്ളാം നന്നായിട്ടുണ്ട് എന്നൊക്കെ. എനിക്ക് എന്ത് മാജിക്കാണ് സംഭവിച്ചത് എന്ന് അറിയില്ല. ഒരു ഫോട്ടോ ഉപയോഗിച്ച് ഒരു മുഴുനീള കഥാപാത്രം സൃഷ്ട്ടിക്കാൻ കഴിഞ്ഞ ഇതിന്റെ സംവിധായകൻ ജെനിതിന് ആണ് ഇതിന്റെ മുഴുവൻ ക്രെഡിറ്റും കൊടുക്കേണ്ടത്. ഈ സിനിമയിൽ എന്നെ ഇങ്ങനെ ഒരു ഭാഗമാക്കിയ മറിയം വന്നു ടീമിന് എന്റെ ആത്മാർത്ഥമായ നന്ദി. സിനിമ വലിയ ഒരു വിജയം ആവട്ടെ.