കോടതി സമക്ഷം ബാലൻ വക്കീൽ; ദിലീപ്- ബി ഉണ്ണികൃഷ്ണൻ ചിത്രത്തിന്റെ ഫസ്റ്റ് ലുക്ക് എത്തി..!

ജനപ്രിയ നായകൻ ദിലീപിനെ നായകനാക്കി ബി ഉണ്ണികൃഷ്ണൻ ഒരുക്കുന്ന പുതിയ ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും ഇന്ന് റിലീസ് ചെയ്തു. കോടതി സമക്ഷം ബാലൻ വക്കീൽ എന്നാണ് ഈ ചിത്രത്തിന്റെ പേര്. നീതി എന്നാണ് ഈ പ്രോജക്ടിന്റെ ടൈറ്റിൽ എന്ന രീതിയിൽ ഒരു വാർത്ത നേരത്തെ സോഷ്യൽ മീഡിയയിൽ പ്രചരിച്ചിരുന്നു. ഇന്ന് അൻപതാം പിറന്നാൾ ആഘോഷിക്കുന്ന ദിലീപിന് ഉള്ള ജന്മദിന സമ്മാനമായി ആണ് ഈ ചിത്രത്തിന്റെ ടൈറ്റിലും ഫസ്റ്റ് ലുക്കും റിലീസ് ചെയ്തിരിക്കുന്നത്. വിക്കുള്ള ഒരു വക്കീലായാണ് ദിലീപ് ഈ ചിത്രത്തിൽ അഭിനയിക്കുന്നത് എന്നാണ് റിപ്പോർട്ടുകൾ പറയുന്നത്.

ദിലീപിനെ നായകനാക്കി ബി ഉണ്ണികൃഷ്ണൻ ആദ്യമായി സംവിധാനം ചെയ്യുന്ന ചിത്രമാണ് കോടതി സമക്ഷം ബാലൻ വക്കീൽ. ബോളിവുഡ് ഭീമന്മാർ ആയ വയാകോം 18 മോഷൻ പിക്ചർസ്‌ ന്റെ മലയാള സിനിമയിലെ ആദ്യത്തെ നിർമ്മാണ സംരംഭമാണ് ഈ ചിത്രം . യു ടി വി , റോക്ക് ലൈൻ പിക്ചർസ് തുടങ്ങിയ വമ്പന്മാരും മലയാളത്തിൽ എത്തിയത് ബി ഉണ്ണികൃഷ്ണൻ ചിത്രങ്ങളിലൂടെ ആയിരുന്നു. യു ടി വി മലയാളത്തിൽ എത്തിയത് ബി ഉണ്ണികൃഷ്ണൻ- മോഹൻലാൽ ടീമിന്റെ ഗ്രാൻഡ് മാസ്റ്ററിലൂടെയും , റോക്ക് ലൈൻ പിക്ചർസ്‌ മലയാളത്തിൽ എത്തിയത് ബി ഉണ്ണികൃഷ്ണൻ- മോഹൻലാൽ ടീമിന്റെ വില്ലനിലൂടെയും ആയിരുന്നു. നീതി എന്ന ഈ ചിത്രത്തിൽ ദിലീപിന് രണ്ടു നായികമാർ ഉണ്ടെന്നും മമത മോഹൻദാസും , പ്രിയ ആനന്ദും ആയിരിക്കും ആ നായികമാർ എന്നും റിപ്പോർട്ടുകൾ വന്നിരുന്നു. രാമചന്ദ്ര ബാബു ഒരുക്കുന്ന പ്രൊഫസ്സർ ഡിങ്കൻ എന്ന ത്രീഡി ചിത്രമാണ് ഇത് കൂടാതെ ഇപ്പോൾ ദിലീപ് ചെയ്തു കൊണ്ടിരിക്കുന്ന സിനിമ.