തലവൻ വീണു; ആസിഫ് അലിയുടെ ഏറ്റവും വലിയ ഹിറ്റായി കിഷ്കിന്ധാ കാണ്ഡം

യുവതാരം ആസിഫ് അലിയുടെ കരിയറിലെ തന്നെ ഏറ്റവും വലിയ ഹിറ്റായി മാറി കിഷ്കിന്ധാ കാണ്ഡം. റിലീസ് ചെയ്ത് 8 ദിവസം കൊണ്ട് 25 കോടിക്ക് മുകളിൽ ആഗോള ഗ്രോസ് നേടിയാണ് ഈ ചിത്രം കുതിക്കുന്നത്. ഈ വർഷം റിലീസ് ചെയ്ത ജിസ് ജോയ് ചിത്രമായ തലവനായിരുന്നു ആസിഫ് അലിയുടെ കരിയറിലെ ഇതുവരെയുള്ള ഏറ്റവും വലിയ ബോക്സ് ഓഫീസ് ഗ്രോസ്സർ. 24 കോടിക്ക് മുകളിലാണ് തലവൻ നേടിയ ആഗോള ഗ്രോസ്.

ആ കളക്ഷൻ വെറും 8 ദിവസം കൊണ്ട് മറികടന്ന കിഷ്കിന്ധാ കാണ്ഡം ആസിഫ് അലിയുടെ ആദ്യ 50 കോടി ഗ്രോസ് ചിത്രമാകുമെന്ന പ്രതീക്ഷയിലാണ് ആരാധകരും സിനിമാ പ്രേമികളും. കഴിഞ്ഞ ദിവസം മുതൽ വിദേശത്ത് വൈഡ് റിലീസ് ആയെത്തിയ ഈ ചിത്രത്തിന്റെ കളക്ഷനിൽ വമ്പൻ കുതിപ്പാണ് പ്രതീക്ഷിക്കുന്നത്. ഗൾഫ് മാർക്കറ്റിലും തലവനെ മറികടന്ന് ആസിഫ് അലിയുടെ ഏറ്റവും വലിയ ഗ്രോസ്സറായി ഈ ചിത്രം മാറിക്കഴിഞ്ഞു .

ദിൻജിത് അയ്യത്താൻ സംവിധാനം ചെയ്ത ഈ ഫാമിലി ത്രില്ലർ രചിച്ചത് ബാഹുൽ രമേശാണ്. ഗുഡ് വിൽ എന്റെർറ്റൈന്മെന്റിന്റെ ബാനറിൽ ജോബി ജോർജ് നിർമ്മിച്ച ഈ ചിത്രത്തിൽ വിജയരാഘവൻ, അപർണ്ണ ബാലമുരളി, ജഗദീഷ്, അശോകൻ, നിഷാൻ എന്നിവരും നിർണ്ണായക വേഷങ്ങൾ ചെയ്തിട്ടുണ്ട്. മുജീബ് മജീദ് സംഗീതമൊരുക്കിയ ചിത്രത്തിന് കാമറ ചലിപ്പിച്ചതും ബാഹുൽ രമേശാണ്.