കിരീടി റെഡ്ഡി നായകനാവുന്ന പാൻ ഇന്ത്യൻ ചിത്രം; ജൂനിയർ എത്തുന്നു

ഗാലി ജനാർദ്ദന റെഡ്ഡിയുടെ മകൻ കിരീടി കന്നഡ സിനിമയിൽ അരങ്ങേറ്റം കുറിക്കുവാൻ ഒരുങ്ങുന്നുവെന്ന വാർത്തയാണ് ഇപ്പോൾ ശ്രദ്ധ നേടുന്നത്. പാൻ ഇന്ത്യൻ റിലീസായി ഒരുങ്ങുന്ന, കിരീടിയുടെ ഈ അരങ്ങേറ്റ ചിത്രത്തിന് നൽകിയിരിക്കുന്ന പേര് ജൂനിയർ എന്നാണ്. മികച്ച ജോലിയാണ് ഈ ചിത്രത്തിൽ കിരീടി ചെയ്തിരിക്കുന്ന റിപ്പോർട്ടുകളാണ് വന്നു കൊണ്ടിരിക്കുന്നത്. ഈ ചിത്രത്തിന്റെ പ്രഖ്യാപന വേളയിൽ, തെലുങ്കിലെ ബ്രഹ്മാണ്ഡ സംവിധായകൻ എസ്.എസ് രാജമൗലി, ഈ യുവനടന്റെ കഠിനാധ്വാനത്തെയും അർപ്പണ മനോഭാവത്തെയും അഭിനന്ദിച്ചു കൊണ്ട് സംസാരിച്ചത് ഏറെ ശ്രദ്ധ നേടിയിരുന്നു. അതിനൊപ്പം തന്നെ കിരീടിയെ പ്രേക്ഷകർക്ക് പരിചയപ്പെടുത്തുന്നതിനായി അവർ പുറത്ത് വിട്ട ടീസറും വലിയ പ്രേക്ഷക ശ്രദ്ധ നേടി. ഇപ്പോൾ തന്റെ ആദ്യ ചിത്രത്തിന്റെ ഷൂട്ടിംഗ് തിരക്കിലുള്ള ഈ താരം, തന്റെ യുവത്വവും ഊർജസ്വലതയും തന്നെയാണ് കൈമുതലാക്കുന്നത്.

രാധാകൃഷ്ണ റെഡ്ഡി സംവിധാനം ചെയ്യുന്ന ഈ ചിത്രം നിർമ്മിക്കുന്നത്, ഒട്ടേറെ സൂപ്പർ ഹിറ്റ് ചിത്രങ്ങൾ നമ്മുക്ക് മുന്നിലെത്തിച്ച പ്രശസ്ത തെലുങ്ക് പ്രൊഡക്ഷൻ ഹൗസായ വാരാഹി ഫിലിം പ്രൊഡക്ഷൻസാണ്. അവർ നിർമ്മിക്കുന്ന പതിനഞ്ചാമത്തെ ചിത്രം കൂടിയാണിത് എന്ന പ്രത്യേകതയുമുണ്ട്. മെഗാ ബഡ്ജറ്റിൽ നിർമ്മിക്കുന്ന ഈ ചിത്രം കന്നഡ, തെലുങ്ക്, തമിഴ്, മലയാളം എന്നീ നാല് ഭാഷകളിൽ ആയാണ് ഒരുക്കുന്നത്. ഈ ചിത്രത്തിലൂടെ ഒരേസമയം നാല് ഭാഷകളിൽ നായകനായി അരങ്ങേറ്റം കുറിക്കുകയാണ് കിരീടി എന്നതാണ് ഇതിന്റെ സവിശേഷത. വി.രവിചന്ദ്രൻ, ജെനീലിയ റിതേഷ് ദേശ് മുഖ്, ശ്രീലീല തുടങ്ങി വലിയൊരു താരനിര അണിനിരക്കുന്ന ഈ ചിത്രത്തിന്റെ പേര് പ്രഖ്യാപിച്ചത് കിരീടിയുടെ ജന്മദിനത്തിലാണ്. റോക്ക് സ്റ്റാർ ദേവി ശ്രീ പ്രസാദ് സംഗീതമൊരുക്കുന്ന ഈ ചിത്രത്തിന് ക്യാമറ ചലിപ്പിക്കുന്നത് ബാഹുബലിയിലൂടെ കയ്യടി നേടിയ കെ സെന്തിൽ കുമാറാണ്. രവീന്ദർ കലാസംവിധാനം നിർവഹിക്കുന്ന ഈ ചിത്രത്തിന് ആക്ഷൻ ഒരുക്കുന്നത് ദേശീയ അവാർഡ് ജേതാവ് കൂടിയായ പീറ്റർ ഹെയ്‌നാണ്.