കേശു ഈ വീടിന്റെ നാഥൻ; മോഷൻ പോസ്റ്റർ നാളെ..!

മലയാളത്തിന്റെ ജനപ്രിയ നായകൻ ദിലീപ് നായകനായി എത്തുന്ന പുതിയ ചിത്രമാണ് കേശു ഈ വീടിന്റെ നാഥൻ. പ്രശസ്ത സംവിധായകൻ നാദിർഷ സംവിധാനം ചെയ്ത ഈ ചിത്രം ഈ മാസം റിലീസ് ചെയ്യുമെന്നാണ് സൂചന. ചിത്രം ഒറ്റിറ്റി റിലീസ് ആയാവും എത്തുക എന്നു വാർത്തകൾ ഉണ്ടെങ്കിലും അതിന്റെ ഔദ്യോഗിക സ്ഥിതീകരണം ഇതു വരെ വന്നിട്ടില്ല. ഒരു ഫാമിലി കോമഡി എന്റർടെയ്നർ ആയി ഒരുക്കിയിരിക്കുന്ന ഈ ചിത്രത്തിന് തിരക്കഥ രചിച്ചിരിക്കുന്നത് തൊണ്ടിമുതലും ദൃക്‌സാക്ഷിയും പോലത്തെ, മികച്ച പ്രേക്ഷക- നിരൂപക പ്രശംസ നേടിയ ചിത്രം രചിച്ച സജീവ് പാഴൂർ ആണ്. ഇപ്പോഴിതാ ഈ ചിത്രത്തിന്റെ ഒരു മോഷൻ പോസ്റ്റർ നാളെ റിലീസ് ചെയ്യുകയാണ്.

നാളെ ഉച്ചക്ക് 12 മണിക്കാണ് ഈ മോഷൻ പോസ്റ്റർ പുറത്തു വരുന്നത്. ദിലീപിനൊപ്പം ഉർവശിയും കേന്ദ്ര കഥാപാത്രമായി എത്തുന്ന ഈ ചിത്രത്തിലെ ഏതാനും പോസ്റ്ററുകളും ഇതിലെ ദിലീപ് ആലപിച്ച ഒരു ഗാനവും സൂപ്പർ ഹിറ്റായിട്ടുണ്ട്. ദിലീപും ഡോക്ടർ സക്കറിയ തോമസും കൂടി നിർമ്മിച്ച ഈ ചിത്രത്തിന് ക്യാമറ ചലിപ്പിച്ചത് അനിൽ നായരും എഡിറ്റ് ചെയ്യുന്നത് സാജനുമാണ്. ദിലീപ്, ഉർവശി എന്നിവരെ കൂടാതെ കലാഭവൻ ഷാജോൺ, ഹരിശ്രീ അശോകൻ, കോട്ടയം നസീർ, ഹരീഷ് കണാരൻ, ജാഫർ ഇടുക്കി, അനുശ്രീ, സ്വാസിക എന്നിവരും ഈ ചിത്രത്തിന്റെ താരനിരയിൽ ഉണ്ട്. നാരങ്ങാ മിട്ടായി എന്നു തുടങ്ങുന്ന ഇതിലെ ഒരു ഗാനമാണ് ദിലീപ് ആലപിച്ചത്. ചിത്രത്തിന്റെ സംവിധായകൻ നാദിര്ഷ തന്നെയാണ് ഈ ഗാനം രചിച്ചിരിക്കുന്നതും ഇതിനു ഈണം പകർന്നിരിക്കുന്നതും. ഈ ചിത്രത്തിലെ ദിലീപിന്റെ ലുക്ക് സോഷ്യൽ മീഡിയയിൽ വലിയ രീതിയിൽ ആണ് വൈറലായി മാറിയത്.